(Díli), Palásiu Governu, 20/07/2026 – Maske hasoru dezafiu oin-oin husi autoridade munisipál, Adriana Soares, negosiante ambulante ida husi Munisípiu Ermera, nafatin hatudu pasiénsia, laran-metin no determinasaun atu sustenta ninia família tanba responsabilidade ba família, nia hili atu hala’o negósiu ki’ik liu-husi fa’an sasán iha dalan ninin, iha área Palásiu Governu nia oin, maske dala barak hasoru obstákulu durante hala’o ninia atividade.
Adriana la’ós foin tama ba negósiu ambulante maibe dezde tinan 2018, nia hahu fa’an ona sasan iha fatin ne’e to’o agora, maske mudansa sira iha sidade no difikuldade oin-oin durante tinan barak, nia nafatin hili atu kontinua fa’an tanba nesesidade moris mak obriga nia.
“Ha’u hili fa’an sasán iha Palásiu Governu nia oin tanba konsidera fatin ne’e di’ak maske la barak, loron-loron ami hetan osan balu de’it dalaruma iha oras balu ami bele hetan de’it $1 ka $2, maibé ne’e mós ajuda sustenta moris ami nian,” dehan Adriana Soares iha palasiu do governu 20/07/2026.
Adriana hateten, moris hanesan negosiante ambulante la’ós buat ida ne’ebé fasil dezafiu bo’ot ne’ebé hasoru mak operasaun husi Polísia Munisipál, ne’ebé dala barak halo nia no negosiante seluk sira lakon sasán ne’ebé sira fa’an.
“Difikuldade bo’ot ne’ebé ami hasoru mak bainhira Polísia Munisipál mai dalaruma sira foti ami-nia sasán to’o balu rahun triste liu tán, sasán balu ne’ebé sira foti ona, bainhira ami husu fila-fali, sira la entrega mai ami sira dehan ami halo fo’er fatin públiku, maibé ami la iha dalan seluk atu buka moris maske hanesan ne’e, ami nafatin pasiénsia no kontinua fa’an,” nia dehan.
Rendimentu ne’ebé Adriana hetan kada loron la’ós bo’ot osan ne’ebé nia simu depende tomak ba númeru kliente ne’ebé mai sosa.
“Loron ida ne’ebé ema sosa barak, ami bele hetan entre $7 to’o $8 maibé bainhira ema la sosa, ami hetan de’it $3 ka $4. Osan ne’e hotu ha’u uza atu sosa hahán no seluk tan ba nesesidade uma laran nian,” nia hatutan.
Bainhira husu kona-ba ninia sentimentu depois tinan walu resin buka moris iha fatin ne’e, Adriana la bele subar ninia laran-moras.
“Ha’u sente kontente tanba fa’an iha ne’e bele ajuda ha’u hetan osan atu sustenta família maibé ha’u triste tebes bainhira Polísia Munisipál mai trata ami hanesan la iha valor ami espera Governu bele haree mós ami-nia susar no buka solusaun ida ne’ebé di’ak ba negosiante ki’ik sira,” Adriana dehan ho matan-been besik monu.
Adriana Soares reflete realidade negosiante ambulante barak iha Díli ne’ebé loron-loron luta atu sustenta família, maske hasoru limitasaun ekonomia no dezafiu iha utilizasaun espasu públiku sira hein katak iha futuru Governu bele buka mekanizmu ida ne’ebé ekilibra entre organizasaun sidade no direitu sidadaun sira atu buka moris ho dignidade.
Jornalista/Estajiária :Natália de Carvalho.
Editor : Ana Maria
