(Díli), Largo Lecidere, 04/08/2026 – Loro-loron, iha Largo Lecidere, Armando Soares, ho idade 72 kontinua halo negosiu ki’ik ida atu sustenta ba nia família uma laran maske idade avansadu no hasoru dezafiu oin-oin, maibe nia la hakarak depende ba ema seluk no nia hili dalan ida buka rasik servisu ho ninian rasik no niahodi bele responde ba nesesidade loro-loron.
Armando dehan katak negósiu simples ne’ebé nia hala’o durante ne’e mak sai fonte prinsipál ba rendimentu família, nia dehan servisu iha fatin ne’e la fasil, tanba dala ruma nia hasoru problema bainhira lori nia sasán mai fa’an, inklui sasán ne’ebé hetan duni husi traballu konstrusaun iha área refere.
“Ha’u halo negósiu tanba ha’u hakarak sustenta ha’u nia família maske ha’u iha ona idade bo’ot, ha’u hakarak servisu ho laran no la depende ba ema seluk dala ruma iha fatin ne’e ha’u hasoru difikuldade barak, liu-liu bainhira lori ha’u nia sasán mai fa’an, tanba dala ruma hetan duni husi traballu iha área ne’e ida ne’e mak dezafiu bo’ot liu ne’ebé ha’u hasoru,” dehan Armando Soares iha Largo Lecidere, 04/08/2026.
Maske rendimentu loro-loron la bo’ot, Armando sente kontente tanba osan ne’ebé nia hetan bele ajuda responde ba nesesidade uma laran nian.
“Ha’u kontente tebes ho moris ida ne’e maske osan ne’ebé ha’u hetan la barak, maibé osan ne’ebé oituan maibae ida ne’e bele ajuda responde ba nesesidade ha’u nia família, ida ne’e mak halo ha’u sente tebes,” nia dehan.
Armando mos hatutan katak maske ekonomia difísil, nia kontinua servisu tanba iha oan nain rua ne’ebé seidauk servisu di’ak no mos nia kaben mos iha idade avansadu, tan ne’e nia iha responsabilidade tomak atu halo negosiu ki’ik ne’e hodi bele garante oan sira nia futuru.
“Ekonomia agora difísil, maibé ha’u iha oan nain rua ne’ebé seidauk bo’ot maske ha’u idade ona, ha’u maibe tenki servisu makás atu bele hetan rendimentu oituan hodi sustenta no responde ba sira nia nesesidade,” hatete Armando.
Durante ne’e, Armando ba mai fatin fa’an lao ain deit tanba nia hela besik Largo Lecidere nia dehan, bainhira sasán barak, nia ho nia kaben servisu hamutuk hodi lori sasán mai fatin fa’an.
“Ha’u mai halo negósiu lao ain de’it tanba ha’u hela besik hela iha ne’e no ha’u la presiza uza transporte bainhira sasán barak liu , ha’u tenki haruka ha’u kaben lori hamutuk mai, depois nia fila ba uma no ha’u kontinua fa’an iha ne’e,” nia hatutan.
Istória moris Armando Soares hatudu katak servisu ho laran metin no responsabilidade ba família bele sai inspirasaun ba ema barak maske hasoru difikuldade ekonomia no limitasaun tanba idade, nia kontinua luta atu buka moris ho dignu liu-husi negósiu ki’ik ne’ebé sai hela sustenta ba nia família.
Ekipa: Media Mudansa
