(Ermera), Railaco, Suku Lehu, 03/08/2026 – Partidu Kmanek Haburas Unidade Nasionál Timor Oan (KHUNTO) realiza pose ba estrutura foun iha Suku Lehu, Postu Administrativu Railaco, Munisípiu Ermera atividade ne’e involve partisipante hamutuk ema nain 544, kompostu husi aldeia sia, inklui Metata, Railaco Leten, Railaco Kraik no aldeia seluk sira.
Pose estrutura foun ne’e konsidera hanesan etapa importante ida atu hametin organizasaun partidu iha nivel baze no reforsa unidade entre membru no simpatizante sira hodi prepara diak liu tan ba atividade sira iha futuru.
Iha okaziaun ne’e, Prezidenti KHUNTO, Naimori, hato’o katak partidu ne’e kontinua lori prinsipiu unidade nasionál hanesan baze atu servi povu Timor-Leste.
“KHUNTO nia luta maka atu hametin unidade nasionál no servi ba povu Timor-Leste bainhira unidade iha, ita bele koalia kona-ba dezenvolvimentu no oinsa atu hadi’a moris povu nian,” dehan Naimori iha suku lihu foin lalais ne’e.
Nia mos hateten katak KHUNTO defende politika sira ne’ebé bele hadi’a kondisaun moris povu, inklui funsionáriu públiku no veteranus sira.
“Funsionáriu sira tenki hetan salariu ne’ebé diak liu tan ami hakarak atu sira bele moris ho dignidade no halo servisu ho diak veteranus sira mos merese apoiu tanba sira mak luta hodi lori independénsia ba rai ida ne’e,” nia hatete.
Tuir Naimori, KHUNTO kontinua sustenta valor tradisionál no kultura Timor-Leste liu-husi nia prinsipiu ne’ebé temi “Tane o rai, tane o lisan no tane o emar”, tanba valor hirak ne’e konsidera importante atu kria estabilidade no unidade iha nasaun.
“‘Tane o rai, tane o lisan no tane o ema’ maka dalan atu hametin estabilidade no hamoris Timor-Leste ida ne’ebé forte katuas no inan sira ne’ebé rai lisan no kultura tenki mos hetan atensaun no apresiasaun,” dehan tan Prezidenti KHUNTO.
Partisipante sira ne’ebé marka prezensa iha atividade ne’e hatudu entusiasmo no apoiu ba pose estrutura foun ne’ebé espera bele fortalese servisu organizasaun partidu iha komunidade no kontribui ba dezenvolvimentu lokal iha futuru.
Iha fatin hanesan, membru lideransa KHUNTO Armanda Berta hatutan katak apoiu husi komunidade Ermera kontribui bo’ot ba rezultadu polítiku partidu nian to’o agora nia agradese komunidade Railaco no KHUNTO konsege hetan kadeira lima iha Parlamentu Nasionál no participa iha Oitavu Governu tanba konfiansa husi povu.
“Partidu KHUNTO hari la’ós atu ukun, maibé atu serbi povu durante iha Governu, maski la konsege halo buat hotu, ami halo programa balu ne’ebé benefisia povu, hanesan apoiu ba xefe família sira durante pandemia COVID-19,” dehan Armanda Berta.
Nia mos promete katak, karik komunidade kontinua fó fiar ba KHUNTO iha eleisaun sira oin mai, partidu ne’e sei aumenta programa apoiu sosial.
“Se Munisípiu Ermera, liu-liu Railaco, kontinua fó fiar ba Partidu KHUNTO, ami sei hadi’a apoiu ba xefe família sira husi USD 200 ba USD 500 kada tinan. Ami mos sei fó prioridade ba infraestrutura, edukasaun, saúde no turizmu atu atrai investimentu no kria oportunidade ba povu,” hatete nia.
Aleinde ne’e, Armanda Berta esplika katak KHUNTO sei kontinua promove programa sosial ba inan isin-rua, labarik sira, katuas no inan ferik, veteranus no família veteranus sira nia subliña katak programa Bolsa da Mãe jerasaun foun importante atu kombate malnutrisaun no hadi’a dezenvolvimentu labarik sira.
Iha fatin seluk, Koordenadór Postu Railaco, Rogerio Babo, hato’o katak atualmente KHUNTO iha ona estrutura iha suku sia iha Postu Administrativu Railaco, no organizasaun ne’e sei kontinua hametin servisu baze.
“Maske eleisaun sira remata ona, Partidu KHUNTO kontinua kaer metin nia prinsípiu ami kontinua organiza dadus no hametin estrutura sira atu prepara ba atividade polítika no dezenvolvimentu organizasaun iha futuru,” dehan Rogerio Babo.
Atividade pose estrutura ne’e remata ho atmosfera solidariedade no optimizmu husi partisipante sira, ne’ebé espera katak estrutura foun bele reforsa servisu organizasaun partidu iha komunidade no kontribui ba dezenvolvimentu lokal iha Munisípiu Ermera.
Ekipa: Media Mudansa
