(Díli), Dom Bosco Komoro, 07/08/2026 – Misa Requiem no despedida ikus ba Professor Bendito Freitas Ribeiro hala’o ho partisipasaun husi família, estudante sira husi Universidade Nasionál Timor-Lorosa’e (UNTL), no kolega dosente sira serimónia ne’e sai momentu importante atu fó omenajen ikus no hatudu respeitu no solidariedade ba matebian Professor Bendito Freitas Ribeiro, ne’ebé durante nia moris kontribui ba área edukasaun no komunidade akademika iha Timor-Leste.
Iha Misa Requiem ne’e, Padre Selebrante hateten katak momentu ida ne’e nakonu ho sentimentu klean no tristeza tanba Aman Maromak mak kriatura ba ita ema hotu hodi moris iha rai memória no buat di’ak hotu ne’ebé ema husik hela tenki rai didiak.
“Sentimentu kle’an nakonu ho tristeza boot ba familia no kolega sira ba matebian Bendito Freitas Ribeiro. Ita hotu mak Maromak nia kriatura, nia mak fó ita moris iha rai no bainhira nia bolu fila, ita tenki simu tanba laiha ema ida mak bele moris tuir nia hakarak to’o ikus.”hatete Padre Selebrante iha Dom Bosco 07/08/2026.
Padre hatutan katak maski matebian la hamutuk ona ho familia, maibé nia memória sei hela nafatin ho ita.
“Moris ema nian hanesan mehi deit bainhira isin fila ba rai, buat di’ak hotu ne’ebé ema halo durante nia moris sei sai memória memória ne’e mak hakerek iha fatuk, hakerek iha ai no liu-liu hakerek iha fuan ema sira ne’ebé hadomi nia.”
Nia mos husu ba familia no kolega sira atu kontinua reza ba matebian nia klamar.
“Maske ho tristeza bo’ot ne’ebé familia hasoru agora, ita fiar katak Maromak mak deside ema ida nia moris bainhira Jesus Kristu simu nia oan sira, nia fó dame no domin ne’ebé sai memória bo’ot ba familia no kolega sira.”
Iha fatinhanesan, espoza matebian Senhora Filomena Noronha hato’o nia laran susar tanba lakon nia parseiru moris ne’ebé durante ne’e sai ai-hun ba familia.
“Hau sente katak hau lakon domin no hau lakon forsa tanba hau lakon ai-hun ne’ebé satan hau no hau nia oan sira nia hanesan prezente ida ne’ebé Maromak fó mai ami, nia hadomi tebes-tebes ami nia familia.”
Nia hatutan katak nia no matebian lao hamutuk liu hosi tempu naruk no hasoru dezafiu barak, inklui tempu matebian halo tratamentu.
“Hau hakarak ema hotu hatene katak Bendito Freitas Ribeiro moris nu’udar aman ida ne’ebé satan netik nia familia iha situasaun saida deit ha’u hakarak rona fali nia lian ba dala ikus, tanba ami nia istória hahú husi moras no luta durante tinan naruk.”
Niamos hatete katak maski distansia entre sira bainhira matebian iha Japaun no nia iha Austrália, komunikasaun nafatin lao di’ak.
“Maski matebian hela iha Japaun no hau iha Austrália, ami nafatin komunika ho di’ak maibé agora momentu ida ne’e la iha ona, tanba nia husik ona ha’u ho ha’u nia oan sira.”
Filomena mos hato’o agradesimentu ba Maromak tanba haraik oan mane nain rua ba sira, maski agora oan sira sei presiza figura aman nian.
“Maromak haraik ba ami oan mane nain rua maske sira sei ki’ik no presiza prezensa aman nian, maibé nia sei hela hanesan istória bo’ot ida no memória ne’ebé sei akompaña ami nia familia nafatin.” Nia hakotu.
Jornalista : Dina/Osterlia
Editor :Ana Maria
