(Díli), Madohi,14 /07/ 2026 – Komunidade Suku Madohi, posto administrativu Dom Aleixo Munisipiu Díli,Aldeia Beto Tasi, hato’o sira nia preokupasaun relasiona ho planu implementasaun projetu alargamentu Aeroportu Internasionál Prezidente Nicolau Lobato,Díli. Liu husi Governu da-sia konstituisiunal, enkuantu Komunidade temi katak projetu ida ne’e sei afeta diretamente sira nia moris no lakon sira nia direitu rai ne’ebé durante ne’e sai fonte moris ba sira.
Representante Komunidade aldeia Beto Tasi dehan,rai sira ne’ebé tama iha área projetu la’ós deit patrimóniu família, maibé mós fatin ba uma hela, halo to’os no atividade ekonomia seluk ne’ebé sustenta sira nia moris loroloron. Tanba ne’e, sira husu Governu atu garante katak prosesu implementasaun projetu hala’o ho transparénsia, respeita direitu komunidade no tuir lei ne’ebé vigora iha Timor-Leste.
” husi komunidade hateten katak sira la kontra dezenvolvimentu ka modernizasaun aeroportu, ne’ebé sei fó benefísiu ba nasaun. Maibé, sira husu atu Governu halo konsultasaun públika ho komunidade afetada sira antes desizaun importante sira foti, no asegura kompensasaun ne’ebé justu ba ema hotu ne’ebé sei lakon rai no propriedade”.dehan komunidade afeitadu ida ba jornalista sira, hafoin halo protesta ba ekipa SEATOU iha suku madohi,14/07/2026
Komunidade ne’e espera,autoridade kompetente sira bele buka dalan atu rezolve problema ida ne’e liuhusi diálogu ho komunidade sira, atu prevene konflitu sosial no garante katak dezenvolvimentu la hamosu susar ba povu ne’ebé hela iha área afetada.
Entretantu,Projetu alargamentu Aeroportu Internasionál Prezidente Nicolau Lobato konsideradu hanesan projetu estratéjiku nasional ne’ebé hakarak aumenta kapasidade aeroportu atu responde ba nesesidade transporte aero iha futuru. Maski nune’e, komunidade afetada insiste katak dezenvolvimentu tenke lao hamutuk ho proesaun ba direitu povu no prinsípiu justisa sosial.
Jornalista / Estajiada : Josefina Maria freitas Desá
Editor :Ana Maria
