(Díli),Palasio Presidensite 14 /07/ 2026 – Empresa Japoneza Kansei Company hamutuk ho CWP Global ofisialmente entrega kareta limpeza alta presaun no aspirasaun saneamentu (vacuum truck) rua ba Sentru Nasional ba Empregu no Formasaun Profisionál (CNEFP) Tibar.
Reprezentante husi empresa Kansei Company no CWP Global hateten, apoiu ida-ne’e hanesan parte husi sira-nia kompromisu atu kontinua kolabora ho Timor-Leste iha dezenvolvimentu rekursu umanu no infraestrutura saneamentu. Sira mos reafirma katak, parseria ne’e sei kontinua liuhusi treinamentu tékniku no apoiu ekipamentu ba sentru CNEFP tibar.
Director Sentru Nasional ba Empregu no Formasaun Profisionál (CNEFP) Jose Simao Tito Bareto deklara, kontente ho doasaun ne’e no kareta rua ne’e sei sai ekipamentu importante ba atividade formasaun estudante sira, nune’e graduadu sira bele hetan esperiénsia prática ho ekipamentu modernu no aumenta oportunidade atu tama iha merkadu servisu.
“dader nee iha okaziaun ida ne’ebe prezidente da Republika Jose Ramos Horta ho laran luak bele oferese fatin hodi entrega viatura husi empreza KANSEI ba CNEFP” hatete Diretor CNEFP ba jornalista sira iha Palasiu Presidente ai-tarak laran, Díli, 14 /07/ 2026.
Entretantu Serimónia “Sanitation Vehicle Unveiling Ceremony”, ho objetivu atu hasa’e kapasidade sentru CNEFP iha área formasaun tékniku kona-ba jestaun be’e foer no saneamentu, atu prepara rekursu umanu Timor-oan sira ne’ebé bele servisu iha setór saneamentu no ambiente.
Kareta sira ne’ebé entrega mak ekipamentu ho sistema alta presaun no pompa aspirasaun, ne’ebé bele uza atu hamoos drenajen, fossa séptika, no lori be’e foer husi fatin sira ne’ebé presiza. Teknolojia ida-ne’e sei ajuda liu tan atu promove sistema saneamentu ne’ebé modernu no proteje saúde públika iha Timor-Leste.
Parseria entre Kansei Company, CWP Global no CNEFP konsidera nu’udar pasu importante ida atu fortifika setor saneamentu iha Timor-Leste, hodi hasa’e kualidade formasaun profisionál no prepara traballadór sira ho abilidade ne’ebé responde ba nesesidade dezenvolvimentu nasaun nian.
Jornalista / Estajiada : Natália de Carvalho Gomes
Editor :Ana Maria
