(Ermera), Atara, 06/08/2026 – Jerasaun Oho Lau realiza inaugurasaun Uma Lisan Oho Lau iha loron ne’ebé konsidera hanesan momentu importante ba preservasaun no fortalecimento identidade kulturál iha komunidade.
Uma lisan ne’e reprezenta nu’udar ai-hun mahon ba oan, bei-oan no jerasaun sira tuir mai, atu kontinua moris no valoriza lisan, kultura no tradisaun ne’ebé husi bei-ala sira uma Lisan Oho Lau sai hanesan uma lulik ida ne’ebé fó matak no hakmatek ba komunidade, hodi garante kontinuidade kostume no valor kulturál sira atu la lakon iha tempu oin mai.
Tuir oan mane husi uma lisan Oho Lau, Jose Mau-Bere, dehan katak inaugurasaun Uma Lisan ne’e lori sentimentu unidade ne’ebé naruk ona la hetan.
“Durante tempu naruk, ami moris separadu no la iha oportunidade atu halibur malu tanba ne’e mak agora, ami harii Uma Lisan ida ne’e, ami sente fila fali hanesan família ida deit,” hateten Jose Mau-Bere foin lalais ne’e.
Nia mos hatutan katak objetivu husi konstrusaun Uma Lisan Oho Lau mak atu hamutuk fila fali ema hotu ne’ebé durante tinan barak fahe malu, hodi kria fatin ida ne’ebé sai simbolu unidade, solidariedade no identidade jerasaun Oho Lau nian.
“Uma lisan ida ne’e la’ós deit uma físika, maibé simbolu ida ba ita nia unidade no ita nia abut iha kultura,” nia dehan.
Konstrusaun Uma Lisan ne’e gastos orsamentu hamutuk $20.500, ne’ebé kontribui husi oan mane, oan feto, inan-aman no membru jerasaun Oho Lau tomak kontribuisaun ne’e reflete espiritu hamutuk no responsabilidade koletiva atu preserva patrimóniu kulturál.
Tuir Lia Nain husi uma lisan Oho Lau Maunel da Costa mos hateten katak Uma Lisan Oho Lau iha valor bo’ot ba jerasaun agora no ba futuru, tanba kultura mak sai fundamentu ba identidade povu ida.
“Kultura mak fundamentu ba ita nia identidade se ita la tau matan ba kultura, ita bele lakon ita nia an rasik,” hateten Maunel da Costa.
Nia aumenta katak Lisan Oho Lau iha istória rasik ne’ebé liga ho lian materna Oho Lau no Tetun Foho Tutun, ne’ebé presiza kontinua aprende no transmite ba jerasaun foun.
“Lian no lisan mak heransa boot ida. Ita tenke kontinua aprende no pasa ba jerasaun foun,” nia afirma.
Seremónia inaugurasaun ne’e realiza durante semana ida ho partisipasaun komunidade tomak Grupo feto-san sira kontribui ho karau, bibi no osan $1.000 kada grupo atu suporta atividade seremónia, enkuantu grupu mane sira lori fos no fahi ba ritual tradisionál.
Partisipasaun komunidade ne’ebé metin hatudu katak solidariedade no unidade sei sai forsa ida atu kontinua moris hamutuk tuir kultura no lisan durante seremónia, katuas no ferik sira mos fahe istória kona-ba origem Uma Lisan Oho Lau no hanorin jerasaun foun kona-ba significado lisan no valor tradisionál.
Inaugurasaun Uma Lisan Oho Lau sai hanesan símbolu ida ne’ebé la’ós deit harii uma, maibé harii fila fali ligasaun entre família, kultura no identidade ho ne’e, komunidade Oho Lau hatudu katak heransa kulturál sei kontinua moris no transmite ba jerasaun sira tuir mai.
Jornalista : Caryn Camões
Editor : Ana Maria
