(Ainaru), Aldeia Gourema – komunidade Suku Horai-Quic, Postu Administrativu Maubisse, Munisípiu Ainaru,Realiza sosialisasaun Tara Bandu hodi prevene sunu rai,tesi-ai arbiru no reduz Lia Fetosaan-Umane ne’ebe mak sai ona kostumi ba komunidade sira.
Xefe suku Horai-Quic Marcelino da Conceição Pires hatete, atividade sosializasaun tara bandu iha suku ne’e ho objetivu atu komunidade sira labele sunu rai,tesi-ai arbiru inklui mos prevene konflitu lia Fetosaan–Umane nune’e ba oin bele garante labarik sira nia futur, enkuantu bele mos prevene risku ba dezastre naturais ne’ebe mak husi komunidade nia attitude tamba la kuidadu natureza hodi tesi-ai no sunu rai arbiru.
“Objetivu husi atividade Tara Bandu mak atu prevene sunu rai no tesi ai-arbiru iha fatin risku sira, inklui atu redus konflitu fetosan ho umane, se ita la kria lei hanesan Tara Bandu,maka iha futuru ita nia oan sira la ba eskola, tanba inan-aman sira kontinua halo lia fetosaan-umane”, dehan Xefe Suku Marcelino da Conceição Pires ba jornalista Média Mudansa iha Suku Horai- Quic foin lalais ne’e.
Nia salienta,atividade Tara Bandu iha suku ne’e nia espasu ba komunidade sira maka tinan lima (5) ba leten mak foin bele fó autoriza ba komunidade atu halo lia fetosaan-umane, atu nune’e bele garante oan sira ne’ebe ho diak,komunidade balun la kumpre regras ka la respeita lei ne’e rasik sei simu sansaun inklui mos multa (kompensasaun) ba autoriedade lokal iha suku Horai-Quic.
“Ha’u rekomenda ba komunidade liu-liu iha Aldeia Gourema suku Horai-Quic atu kompriende katak lei ne’ebé ita halo iha benefísiu ba future no diak ba ita nia aldeia no suku, husu komunidade iha konsiénsia atu suporta ita nia oan sira ba eskola no garante futuru di’ak liu tan” nia rekomenda
Nia hatutan, dalaruma konflitu akontese barak liu iha lia fetosaan-umane hanesan mosu ideia diferente entre part rua (fetosaan-umane), enkuantu tamba komunidade sira seidauk komprende lei sira konaba Tara-Bandu no estraga labarik sira nia future.
“Ita tenki evita no lori labarik sira ba lia ka festa fetosaan-umane, tanba labarik sira sei la kompriende no sira nia tempu mak tempu aprende no estuda”, nia konklui
Iha fatin hanesan lia na’in Domingos Martins hatutan,komunidade hamutuk ho Administrador Munisípiu Ainaru, no autoridade sira hatur regulamentu Tara Bandu iha Suku no Aldeia sira, ho nue’e regulamentu refere sei fó fatin ba proibisaun ida ne’ebé hetan konkordánsia husi komunidade no sai rasik hodi aplika.
“Tara Bandu ne’e importante atu proteje no promove kultura ho lisan iha Munisípiu Ainaru, hodi transmite ba jerasaun hirak tuir mai, karakter Tara Bandu nian aplika ba ema ho ema, ema ho balada, ema ho natureza, inklui atu redus lia fetosaan-umane”, Hatutan Lia Nain Domingos
Entertantu husi Tara Bandu ne’e, lei ne’e sei aplika no fó hanoin ba populasaun husi Suku Horai-Quic kompostu husi aldeia Gourema, Hatu-São, Kartolu no Lauheli, ho objetivu atu reduz risku dezastre naturais no reduz lia fetosaan ho umane.
Jornalista: Inácio Silva
Editora: Gaudencia Belo
