(Díli) Colmera- Kordenadora Kompañia Uma-Dato, Joana Soares, hatete, Tais mak identidade Timor nian, presiza dezenvolve no promove di’ak liu tan, liu-husi halo transformasaun ba roupa modernu sira hanesan; kalsa, vestidu, jas no seluk tan ne’ebé mak utiliza tais.
Kordenadora Joana Soares hatete, tais ne’ebé mak sira produs hahú kedas husi bei-ala sira, nune’e nia kontinua fali produsaun ne’e iha tinan 2000.
“Ami iha kompañia rasik kona-ba produsaun tais ho naran Uma-Dato, ami mós sempre halo produsaun ba tais husi munisípiu hotu-hotu, tais ne’ebé mak ami produs ne’e hahú kedas husi bei-ala sira, ha’u kontinua fali iha tinan 2000 to’o ohin loron”, dehan Joana Soares ba Média Mudansa, iha Colmera, Kinta 28/08/2025.
Kompañia Uma-Dato fó ona servisu ba Timor oan nain sanulu resin-rua (12) kompostu husi feto sanulu (10) no mane nain rua (2).
“Da-daun ne’e ha’u nia kompañia iha traballador Timor oan nain sanulu resin-rua (12), iha feto sanulu (10) no mane nain rua (2) “, hatete nia.
Nune’e rendimentu ne’ebé Joana hetan kada loron depende de’it ba vizitante, banhira ema vizita barak mak nia sei hetan dólar atus ida ($ 100), dala-ruma menus vizitante nia hetan de’it dólar rua-nulu ($20) to’o dólar rua-nulu resin-lima ($25) kada loron.
“Rendimentu ne’ebé ha’u hetan depende ba vizitantes ne’ebé mak mai vizita, kuandu vizitantes barak ha’u bele hetan to’o dólar atus ida ($100), se menus vizitantes ha’u hetan de’it dólar rua-nulu ($20) to’o dólar rua-nulu resin-lima ($25)”, nia hatutan.
Nune’e nia hetan formasaun husi Fundasaun Alola kona-ba tranformasaun tais ba roupa modernu, husi ida ne’e nia ba implementa fali iha nia grupu hodi halo transformasaun tais ba roupa ne’ebé mak modernu.
“Ami tuir formasaun husi Fundasaun Alola kona-ba diversifikasaun no transformasaun ho ida ne’e mak ami implementa fali iha grupu, ita tenki dezenvolve no promove ita nia tais tanba tais sai hanesan identidade Timor nian, ita mós promove liu-husi halo transformasaun ba roupa ne’ebé mak modernu hanesan, Jas, Vestidu, Kalsa no seluk tan”, informa nia
Joana hatutan, dezafius ne’ebé nia hasoru mak hanesan; rendimentu, fatin negósiu no menus vizitantes, maske hasoru dezafius hirak ne’e, kada tinan Joana sempre sempre hadia kualidade husi nia produsaun rasik atu bele atrai sosa nain sira.
“Dezafius ne’ebé ha’u hasoru primeiru mak menus rendimentu, segundu fatin ne’ebé ami hala’o negósiu ladun luan no klo’ot liu, terseiru menus vizitantes, ho ida ne’e ami la iha maneira seluk só kada tinan ami hadia de’it kualidade produsaun oinsá ami iha planu hodi hadia nia kualidade di’ak liu tan atu bele atrai sosa nain sira”, nia haktuir.
Uma-Dato mós halo kooperasaun ho Ministériu Komérsiu Indústria (MCI sigla português) nune’e iha feira ruma sira sempre hetan konvite hodi partisipa.
“Ami mós sempre hetan konvida husi Ministériu komérsiu Indústria (MCI), no ami halo koperasaun di’ak ho sira kada feria ami sempre hetan konvite husi sira hodi partisipa iha feira sira”, nia salienta
Nia dehan hanesan jerasaun kontinuadór tenke hadia kualidade produsaun, labele hatene de’it mak soru tais, tenki hatene mós halo produsaun tais sai fali roupa ne’ebé mak modernu.
Enkuantu iha tinan 2024, Joana hetan oportunidade lori produtu sira ne’ebé reprezenta identidade no kultura Timor-Leste nian ba iha nasaun Singapura.
Antes termina konversa, Joana husu ba feto maluk sira ne’ebé mak hatene halo produsaun ba tais atu labele karak sira nia matenek, nune’e nia mós husu ba foinsa’e feto sira atu labele baruk aprende, tanba tais mak sai hanesan identidade Timor-Leste nian.
Jornalista: Olvadis Clara da Costa/ Madalena de Lima
Editora: Sandi Belo
