(Díli),Antigu Merkado Komoro 13 /07/2026– Inséndiu bo’ot ne’ebé akontese iha área Antigu Merkado Komoro estragus uma kain hamutuk sanulu resin rua (12) inklui materiál uma laran. Akontesementu ne’e laiha vítima ida mate, maibe vitima sira lakon sasan importante sira hanesan uma, roupa inklui dokumentu importante sira.
Tuir informasaun husi vítima Valdumuro ximenes corea hateten,kronologia ahi-han uma hahu iha oras lokraik no lalais espalha tanba uma sira besik malu no balun konstrui ho material ne’ebé fasil atu ahi han. Viziñu sira nebe besik koko hamate ahi ho be’e no ekipamentu simples, maibé la konsege salva tanba ahi boot liu. Ho nune’e ekipa Bombeiru to’o kedan iha fatin akontesementu hodi prevene ahi ne’ebe lakan ho intensidade ne’ebe makas maibe ahi kontinua hadaet tan ba uma seluk.
“Ami salva deit mak isin-lolon no Sasan hotu remata. Agora ami hein deit apoiu husi Governu no ema di’ak sira,” dehan vítima ba jornalista Media Mudansa iha fatin akontesementu merkadu komoro,Dili, 13 /07/2026.
Iha fatin hanesan Xefe Suku Komoro,konfirma inséndiu ne’e afeta diretamente ba família uma kain sanulu resin rua. Nia hatete autoridade lokal halo ona levantamentu ba estragus no dadus vítima sira, depois haruka ba autoridade kompetente atu fasilita ajuda emerjénsia.
“Prioridade agora mak fó hela fatin temporáriu, ai-han, bee mos no nesesidade bázika ba família afetada sira. Ami hein Governu no entidade relevante sira bele lalais responde ba situasaun ida ne’e,” hatete Xefe Suku iha komoro
Nia mos husu komunidade atu kontinua solidariedade no ajuda família sira ne’ebé agora enfrenta difikuldade boot tanba lakon hela fatin no ekipamentu sira seluk.
Enkunatu até agora, família afetada hela deit iha viziñu sira nia uma hanesan fatin temporáriu, no presiza tebes asisténsia emerjénsia hanesan ai-han, roupa, ekipamentu eskola ba labarik sira no apoiu sira seluk.
Tuir observasaun,autoridade lokal apela ba Governu, organizasaun umanitária, setor privadu no sidadaun sira atu hamutuk fó tulun ba vítima sira, atu bele haforsa fali moris no hadi’a hela fatin ne’ebé lakon tanba inséndiu ne’ebe akontese.
Jornalista / Estajiada : Josefina Maria freitas Desá
Editor :Ana Maria
