(Díli), lapangan paramuka 11/08/2026 – Federasaun Futeboll Timor-Leste (FFTL) deside fó tan oportunidade ba Treinadór José Pedro atu lidera Seleksaun Nasionál Timor-Leste iha kompetisaun FIFA ASEAN Cup, maski ninia kontratu atual sei remata iha loron 31 fulan Agostu 2026.
Desizaun ne’e mai hafoin FFTL halo avaliasaun kona-ba dezempenu ekipa no treinadór durante kompetisaun ikus, inklui jogu faze grupu iha Segunda Divizaun. FFTL konsidera katak FIFA ASEAN Cup iha loron 24 fulan Setembru sai hanesan kompetisaun importante ida ne’ebé presiza preparasaun no kontinuidade teknika.
Adjuntu Sekretáriu-Jerál FFTL, Fernando Batista Xavier, hateten katak desizaun kona-ba treinadór sei bazeia ba rezultadu avaliasaun no relatóriu detalhadu hosi Diretoria Seleksaun Nasionál.
“Jogu faze grupu iha Segunda Divizaun no ami fila fali mai iha foin lalais ne’e lidera direita husi ita nia Presidente Federasaun Timor-Leste, Sekretáriu-Jerál no Diretór sira hotu tamba ne’e, desizaun refere ona atu Diretór Seleksaun Nasionál relata detalhadamente no relativu ho desizaun final ne’ebé ita hotu hein atu rona iha enkontru kona-ba avaliasaun refere,” dehan Fernando Batista Xavier.
Iha fatin hanesan, Diretór Seleksaun Nasionál FFTL, João Maneco Soares Amaral, hatutan katak FFTL halo avaliasaun kona-ba dezempenu José Pedro iha jogu ikus Segunda Divizaun no konsidera nesesidade ba kontinuidade preparasaun ekipa antes enfrenta FIFA ASEAN Cup.
Tuir nia, FFTL deside extende mandatu José Pedro espesifikamente to’o remata FIFA ASEAN Cup, ne’ebé sei remata iha inísiu fulan Outubru hafoin kompetisaun ne’e, FFTL sei halo avaliasaun fali bazeia ba rezultadu no dezempenu ekipa.
“Fiderasaun halo avaliasaun kona-ba dezempenu no servisu treinadór José Pedro iha jerál to’o jogu ikus Segunda Divizaun fiderasaun iha questaun balun atu deside kona-ba ninia extensaun, depois hare fali ninia kontratu ne’ebé sei hotu iha loron 31 fulan Agostu, liga ho jogu importante ne’ebé tuir mai iha loron 24 fulan Setembru, FIFA ASEAN Cup,” hatete João Maneco.
Nia mos hatutan katak kompetisaun FIFA ASEAN Cup sei sai oportunidade importante ba ekipa Timor-Leste tanba tempu preparasaun limitadu tebes tanba ne’e, FFTL konsidera kontinuidade José Pedro hanesan opsaun atu fó estabilidade ba ekipa durante preparasaun no kompetisaun.
Diretór Seleksaun Nasionál FFTL João Maneco mos hateten katak FFTL tau alvu aas ba Timor-Leste iha FIFA ASEAN Cup, ho objetivu atu sai kampiaun iha grupu no hetan oportunidade atu avansa ba fase tuir mai.
Timor-Leste sei hasoru ekipa sira iha grupu, inklui Kambódia no Laos, no FFTL hare katak Seleksaun Nasionál iha kapasidade atu disputa ho ekipa sira seluk iha kompetisaun ne’e.
“Tarjetu ne’ebé fiderasaun hatun ona ba jogu ne’e, hanesan ita hotu hatene, iha grupu ida iha Kambódia no mos ida iha Laos fiderasaun nia tarjetu katak ita tenki sai kampiaun ba grupu ne’e para ita bele hala’o jogu final,” dehan João Maneco.
Nia esklente katak, se Timor-Leste konsege pasa hosi Segunda Divizaun, ekipa sei iha oportunidade atu kompete iha Divizaun Primeira maske ranking nasaun sira seluk iha Segunda Divizaun aas liu Timor-Leste, FFTL fiar katak ho preparasaun diak, ekipa nasional bele fó kompetisaun.
Aleinde asuntu treinadór, Diretór Seleksaun Nasionál FFTL mos ko’alia kona-ba jogadór Timor-Leste sira ne’ebé joga iha rai liur, ne’ebé komunmente bolu ho naran jogadór diaspora.
Tuir João Maneco, jogadór diaspora sira, inklui sira ne’ebé envolve ona iha kompetisaun Under-23 no sira ne’ebé foin mai husi Singapura, sei hetan oportunidade atu hatudu sira nia kapasidade iha seleksaun.
“Kona-ba jogadór ita nia alin sira ne’ebé kompete iha rai liur, sira ne’e baibain ita temi diaspora. Sira nia prezensa iha Laos foin mak primeira vez iha seleksaun, liu-liu ita nia alin sira ne’ebé envolve an ona iha Under-23, deside tinan kotuk mai iha SGMS no foin dadaun menan Singapura,” nia dehan.
Nia hatutan katak prezensa jogadór diaspora sira sei avalia tuir sira nia performanse iha kampu, liu-liu iha kompetisaun senior.
Diretór Seleksaun Nasionál FFTL subliña katak konvokasaun jogadór ba Seleksaun Nasionál la signifika katak jogadór refere sei diretamente tama iha ekipa titular.
Desizaun kona-ba kompozisaun ekipa, inklui seleksaun ba 11 jogadór titular, sei depende ba avaliasaun no desizaun téknika husi treinadór.
“Konvida sira mai la’ós automatikamente katak sira tama iha ekipa prinsipál ne’e liga liu ho desizaun téknika treinadór hanesan responsavel tékniku iha poder tomak atu fó resposta ba jogadór sira jogadór atu tama iha melhor 11 mos depende ba responsibilidade no desizaun treinadór nian,” nia afirma
Ho desizaun ne’e, FFTL hein katak José Pedro bele kontinua preparasaun ekipa Timor-Leste ba FIFA ASEAN Cup, antes FFTL halo avaliasaun fali kona-ba ninia mandatu no futuru iha Seleksaun Nasionál hafoin remata kompetisaun iha inísiu fulan Outubru.
Ekipa: Media Mudansa
