(Dili), Pantai Kelapa, 20/08/2026 – Institutu Nasional Kombate HIV/SIDA (INCSIDA) kontinua halo sosializasaun ba estudante Universidade Nasional Timor Lorosa’e (UNTL), ho objetivu atu loke sira nia hanoin kona-ba prevensaun HIV/SIDA no risku husi relasaun seksuál la seguru.
Iha atividade sosializasaun ne’e, Prezidente INCSIDA, Daniel Marçal, hatete katak juventude mak parte importante no futuru nasaun. Tanba ne’e, joven sira presiza hetan informasaun loos kona-ba saúde seksuál no prevensaun HIV/SIDA.
“Tanba agora joven mak barak liu iha ita nia nasaun no joven mak futuru nasaun. Karik joven sira la kuidadu sira nia aan, ikus mai bele kona moras HIV/SIDA,”hatete Presidente INCSIDA Daniel Marçal iha resintu INCSIDA 20/08/2026
INCSIDA mós halo esforsu atu koopera ho Ministériu Edukasaun no parte relevante sira, atu konsidera integrasaun edukasaun kona-ba HIV/SIDA iha kurikulum, hahú husi pre-sekundária, sekundária to’o universidade inisiativa ne’e konsidera importante atu estudante sira hetan edukasaun no konsiensializasaun kona-ba prevensaun HIV/SIDA desde idade escolar.
Daniel Marçal subliña katak edukasaun kona-ba saúde no moralidade tenki involve família, liu-liu inan-aman, atu bele orienta no akompaña oan sira tanba ne’e, família no instituisaun edukasaun presiza servisu hamutuk atu fó informasaun ne’ebé loos no responsavel ba joven sira.
INCSIDA mós konsidera katak parte relijioza no lideransa komunidade sira iha papel importante iha edukasaun no konsiensializasaun kona-ba HIV/SIDA, liu-liu ba joven feto no mane, atu promove komportamentu seksuál ne’ebé seguru no responsavel.
Iha atividade sira hanesan ne’e, INCSIDA mos kontinua servisu hamutuk ho profisionál saúde, inklui fasilita teste HIV, atu partisipante sira bele hatene sira nia estatutu HIV no, se presiza, hetan orientasaun no intervensaun saúde sedu.
Iha fatin hanesan representante estudante UNTL, Titília António Esperal da Conceição dos Santos, hatete katak nia kontente tanba bele partisipa iha atividade sosializasaun ne’e.
“Hau kontente tebes tanba bele mai tuir sensibilizasaun ida ne’e. Agora hau bele komprende diak liu kona-ba moras HIV/SIDA no oinsá moras ne’e bele hada’et husi ema ida ba ema seluk,”Nia hatutan Titília António Esperal da Conceição dos Santos.
Nia mos rekomenda ba maluk joven sira atu kuidadu sira nia saúde no evita komportamentu seksuál ne’ebé bele aumenta risku ba HIV/SIDA.
“Hau hakarak rekomenda ba maluk joven sira atu kuidadu sira nia aan no evita relasaun seksuál la seguru, tanba bele fó impaktu la diak ba ita nia saúde no aumenta risku atu hetan HIV/SIDA,” nia hatutan.
HIV/SIDA sei sai dezafiu importante ba saúde públika, tanba prevene infesaun no halo detesaun sedu mak importante tebes. Tanba ne’e, INCSIDA enfatiza katak edukasaun, prevensaun, teste no asesu ba servisu saúde presiza kontinua hamutuk atu proteje saúde no futuru juventude Timor-Leste.
Ekipa: Media Mudansa
