(Díli) Manleuana- Tersa ne’e Universidade da Paz (UNPAZ) Hamutuk ho Heavenly Culture, World Peace, Restoration of Light (HWPL sigla Inglês) no Arte Moris realiza semináriu recognition of Distinguished Contribuitions to Peace Mural ba estudante sira iha UNPAZ hodi hala’o pintura ba moru sira iha Universidade nian ho tema Paz.
Dekanu Fakuldade Siénsia Sosiais Humanu, Fernando Dias Gusmão, hatete, HWPL organizasaun ida ne’ebé mak promove paz iha mundu no sira ba iha Universidade da Paz no hamutuk ho Arte Moris atu hala’o atividade pinta moru sira ne’ebé iha UNPAZ ho tema paz nian.
“Ohin loron ida ne’e Universidade da Paz hamutuk ho HWPL organijasaun ida ne’ebé mak promove paz iha mundu no sira mai iha Universidade da Paz no hamutuk ho Arte Moris atu hala’o atividade pinta moru sira ne’ebé mak iha UNPAZ ho tema paz nian, ita hotu hatene katak arte moris halo ona pinturas ba iha moru sira iha Díli laran ho tema moris hakmatek no paz iha Timor, tanba ne’e mak programa ida ne’ebé mak HWPL hala’o ona iha tinan 2003, iha tinan 2003 ne’e sira mai halo konferensia ida iha Universidade da Paz hodi hakarak envolve ita nia líder sira no liu-liu ita nia instituisaun akademiku sira atu partisipa hodi promove paz, ita nia rai hanesan nasaun ida ne’ebé mak uluk hasoru konflitu ne’ebé bo’ot fó sofrementu ba ita nia povu nune’e ita mós hakarak ohin loron kontribui ba hari’i paz iha ita nia nasaun no iha mundu rai klaran”, dehan Dekanu Fernando Dias Gusmão ba jornalista sira iha Universidade da Paz, Tersa, 03/06/2025.
Dekanu ne’e hatutan, UNPAZ mós partisipa ona iha konferensia paz mundiál nian iha Korea do Sul, tanba ne’e hakarak instituisaun akademiku sira tenki introduz paz no hakribi ba violénsia.
“Aliende ne’e Universidade da Paz mós partisipa ona iha konferensia paz mundiál nian iha Korea do Sul no da-daun ne’e ita hakarak iha ita nia instituisaun akadémiku sira no iha ita nia interasaun entre dosente ho dosente, dosente ho estudante sira, ita tenke introduz kestaun paz nian no ita tenke hakribi violénsia ne’ebé mak sempre lori vítima ba ita nia ema sira, no mós buat ida paz ne’e buat ne’ebé di’ak tebes no ita moris hakmatek ho armónia ita bele kontenti moris iha ita nia rai rasik”, dehan nia
Nia salienta, estudante hotu-hotu bele hola parte maibé ida ne’ebé mak hanesan promove no envolve makas liu iha prosesu sira ne’e mak iha Universidade da Paz, iha Departementu Estudu da Paz no Departementu Relasaun Internasionál sira mak sempre tuir atividades paz nian no hakerek tema sira kona-ba paz no halo diálogu sira kona-ba paz maibé la taka dalan ba joventude ka estudante hotu-hotu atu partisipa ativu hodi promove paz.
Iha fatin hanesan Prezidenti Arte Moris Iliwatu Danabere, hatutan, sira seidauk deside lolos data atu halo pintura ba moru sira, tanba prepara matériais no kolabora ho pintór sira.
“Ami seidauk desidi data tanba ha’u tenke organiza matériais serbisu sira tanba atividade ne’e la’os arte moris de’it maibé ha’u sempre kolabora ho pintór sira husi grupu seluk, karik inisiu iha fulan Jullu hanesan ne’e ami sei hahú atividade”, hatete Prezidente Arte Moris.
Nia haktuir, sira hahú pinta durante krize 2006 nian, antes ne’e sira lao pint aba istória kulturál Timor nian kada Munisípiu ida ne’e hanesan parte husi sira nia misaun organizasaun nian.
“Ami lao pinta ba istória kulturál ita nian kada Munisípiu, maibé ida ne’e parte husi ami nia misaun organijasaun nian, pintura ne’e hanesan mensagem dame nian ba ita nia rai rasik, HWPL ne’e organizasaun mundiál sira nia algu ne’e bo’ot, maibé ami arte moris ho pintór lokál ne’e ami nia intensaun foka liu ba ita nia rai laran, tanba istória pasadu ne’e mesak luta nain, tempu agora ne’e joven sira tenke aprende luta ida modelu seluk, lalika uza tan fíziku barak”, tenik nia
Entretantu iha semináriu ne’e hetan partisipasaun husi dekanu fakuldade sira, dosente no partisipa maximu husi estudante Unpaz.
Jornalista: Rogerio Anuno
Editora: Quisânia Gleide
