(Díli), Kampus UNTL Kai-koli,10/07/2026 – Estudante husi Universidade Nasional Timor Lorosa’e (UNTL), Fakuldade Siências Sociais no Politica (FCSP) liu husi Departamento Komunikasaun Sosial, hala’o atividade viagen ba Munisípiu Ermera, Suku Fatkero,ho objetivu realiza atividade Hametin amizade/binakrap durante loron tolu (3), ho objetivu habelun amizade entre estudante ho komunidade lokal no haforsa aplikasaun koñesimentu teóriku iha universidade ba pratika direta iha terrenu.
Tuir estudante Fakuldade Siênsia Sociais no Politica (FCSP) no Departamento Komunikasaun Sosial Jefarina Amaral hatete, atividade ne’e hetan suporta husi professor sira no alumni departamentu, nune’e bele realiza ho susesu. Nia relata katak partisipante la’ós de’it husi estudante periodo 2024, maibé envolve mos husi estudante periodo 2023 to’o 2026, maski estudante balun estudante husi period 2022 seidauk partisipa tanba halao hela estajiu profisionál.
“ preparasaun ba atividade ne’e hala’o durante fulan ida resin, ho esforsu bo’ot husi komisaun organizadora. Maski atividade seidauk remata, komisaun organizadora kontinua asegura katak programa ne’e lao tuir planu hodi hetan rezultadu di’ak” hatete estudante Jefarina Amaral ba jornalista Media Mudansa iha resintu Kampus UNTL Kaikoli, 10/07/2026.
Nia relata,total estudante ne’ebé partisipa iha viagen ne’e hamutuk ema nain 300 resin, ne’ebé sei desloka ba fatin destinadu iha Munisípiu Ermera.
Iha fatin hanesan, Diretóra Departamento Komunikasaun Sosial, Prof,Dr. Constância de Jesus, hateten,atividade Hametin amizade/binakrap la’ós deit foin dala ida ne’e, maibé kada tinan sempre halao ho objetivu hodi habelun estudante ho sosiedade, no fó oportunidade atu pratika teoria ne’ebé aprende ona.
“husu ba estudante sira atu hatudu dixiplina no responsabilidade durante atividade, tanba estudante ne’ebé atu sai profisionál la’ós de’it koñesimentu teóriku, maibé presiza mos esperiénsia pratika no kapasidade atu hakbesik an ba komunidade hodi lori mudansa di’ak” Husu Constância de Jesus ba estudante sira
Tuir Diretóra, objetivu prinsipál husi atividade Hametin amizade/binakrap ne’e mak atu haforsa relasaun entre estudante foun tuan sira, nune’e sira bele koñese malu di’ak liu tan no senior sira mos bele fahe esperiénsia ba estudante foun sira.
Jornalista : Caryn Camões
Editor :Ana Maria
