(Díli), Kampus Liçeu, 11/06/2026 – Estudante Universidade Nasional Timor Lorosa’e (sigla-UNTL), liuhusi Asosiasaun Akademika Estudantil Fakuldade Edukasaun no Humanidade (sigla-FEH) hato’o preukupasaun kona-ba alegasaun abuzu poder husi Diretora Departamentu Ensino de Fízika ne’ebé konsidera la tuir lei no kontra regulamentu akademiku universidade nian.
Iha komunikadu imprensa, asosiasaun estudantil ne’e relata, nudar parte importante ida iha universidade hodi kumpri pilares tolu (3) husi akademiku: estudu, peskiza no kontrolu sosial, inklui tenki hetan direitu hodi kompleta estudante sira nia prosesu akademiku ho justisa.
Portavoz Asosiasaun Akademika Estudantil Faculdade Edukasaun no Humanidade (sigla-FEH) Romario M. Leite relata,Problema ne’ebé mosu iha Departamentu Fízika mak alegasaun falsifikasaun notas no manipulasaun valor.
“No estudante balu ne’ebé tuir ona aula no exame, maibé valor kontinua la iha administrasaun, nebe prezudika ba ami estudante sira hodi tun ba pratika pedagojia daruak tuir estudu nian, Diretora Departamentu impede estudante na’in 25 atu la bele tuir estajiu, maski regulamentu akademiku la limita ami estudante sira” hatete Porta voz (FEH) ba jornalista sira husi Komunikadu Imprensa iha Kampus Liçeu,11/06/2026
Nia subliña,Iha loron 01 fulan Juñu tinan 2026, estudante sira hasoru Vice Dekanu Assuntu Akademiku ne’ebé afirma katak: “UNTL liuhusi nia regulamentu akadémiku la limita estudante sira hodi ba hala’o nia estudu ida prátika pedagojia daruak (2), no prátika pedagojia daruak (2) ida-ne’e ezijénsia husi kurrikulum ne’ebé mak ohin loron UNTL uza.
Tuir Porta-voz ne’e husu Diretora Departamentu Fízika tenki buka meios oinsa bele rezolve lalais kazu nee tanba durante diretora uza nia kompetensia hodi ignora asuntu nebe mak agora dadaun estudante iha departamentu Fizika preokupa.
“Se ba oin faculdade la halo kooperasaun ho departamentu fizika, ami prontu blokiadu espasu no responsablidade ba nee rasik.” Nia akresenta
Iha sorin seluk Estudante departamentu Fizika Eugénio Soares Mau-Koli, reforsa sira koko buka alternativu hodi halo komunikasaun ho diretora departamentu Fizika maibe laiha solusaun ba kazu nee, nune’e estudante sira konsidera diretora la kompriende regras akademika nian.
“Ami sei la nonok no la para deit iha komunikadu imprensa ida ne’e, se laiha resposta husi diretora kona-ba kazu nebe impede ami nia pratika no estajiu tan ne’e ami nafatin ejiji, tanba ami nia direitu atu kritika no auto kritika maibe Diretora laiha kapasidade hodi hola medida nebe mak ami preokupa hela nune’e ami hein to loron tolu laiha resposta mak ami prontu halo dialogo ineternal ho Fakuldade .” dehan nia
Entretantu to’o notisia ne’e publika, Media Mudansa tenta halo komfirmasaun ho Diretora Departamentu Fizika Universidade Nasional Timoro Lorosa’e (Sigla-UNTL) maibe laiha fatin.
Jornalista/Estajiada : Caryn Camões
Editor :Ana Maria
