(Díli), Liceu, 17/06/2026 – Estudante sira husi Universidade Nasional Timor Lorosa’e (UNTL) aprezenta mosaun ida hodi hato’o preokupasaun kona-ba alegasaun prátika ilegál no hahalok ne’ebé konsidera la tuir prinsípiu akademiku iha Faculdade Edukasaun no Humanidade, liu-liu iha Departamentu Língua Tetun.
Iha komunikadu imprensa ne’e estudante sira hato’o katak universidade tenke sai espasu ida ne’ebé promove integridade, transparénsia no justisa ba komunidade akademika tomak.
Porta-voz Auxiliadora de Santa Rosa, hatete UNTL, hanesan universidade estatal ida iha Timor-Leste, iha responsabilidade atu mantén ambiente akademiku ne’ebé bazeia ba legalidade no étika.
“UNTL hanesan úniku universidade estatal iha Timor-Leste ne’ebé bazeia ba prinsípiu legalidade no iha vizuan atu sai sentru ekselénsia iha nasaun ida-ne’e,” ehan Auxiliadora iha kampus Central Liceu, 17/06/2026
Nia mos refere ba Lei Nú. 7/2020, 26 Agostu, ne’ebé enfatiza importánsia prevene no kombate korupsaun iha instituisaun públika sira.
Estudante sira, alegasaun kona-ba kobransa ilegál no utilizasaun podér de forma inadequada la reflete valor akademiku ne’ebé universidade promove ba estudante sira.
“Prátika kobransa ilegál ne’e la reflete ba kondisaun akademika no la tuir valor ‘matenek no lia loos’ ne’ebé UNTL promove, nia dehan
Iha oportunidade ne’ebé hanesan, estudante André da Costa Amaral hatete alegasaun sira ne’e, tuir nia observasaun, la’ós problema foun, maibé refere ba situasaun ne’ebé estudante balu afirma akontese ona durante tinan barak.
Nia dehan situasaun hirak ne’e bele afeta ambiente aprendizajen no konfiansa estudante sira ba sistema akademiku.
“Hahalok ida-ne’e afeta estudante sira-nia mentalidade no estraga konfiansa iha ambiente akademiku,” hatete nia.
Relasiona ho preokupasaun ne’e, Asosiasaun Akadémika Estudantil Faculdade Edukasaun no AED Tetun hamutuk ho estudante ativu sira hato’o kompromisu atu kontinua promove transparénsia no responsabilizasaun iha universidade.
Sira mos apela ba lideransa Departamentu, Faculdade no Reitoria atu halo avaliasaun no investiga alegasaun sira ne’e tuir prosedimentu no regulamentu vigora, hodi garante katak prosesu hotu-hotu hala’o ho justisa no imparsialidade.
Iha komunikadu ne’e, estudante sira mos hato’o katak sira hein resposta no medida konkreta husi autoridade relevante iha tempu badak. Karik laiha progresu ka resposta ne’ebé satisfaz, sira konsidera atu hala’o forma ekspresaun públika seluk, inklui protestu pasífiku, atu kontinua hato’o sira nia preokupasaun.
Kazu ne’e atrai atensaun komunidade akademika tanba levanta diskusaun kona-ba importánsia integridade, boa governansa no responsabilidade iha instituisaun superior sira, estudante sira espera katak liu husi diálogu no mekanizmu legal sira, universidade bele kontinua fortalese ambiente aprendizajen ne’ebé seguro, transparente no fó konfiansa ba estudante hotu-hotu.
Jornalista/ Estajiada : Caryn Camões
Editor : Ana Maria da Silva
