(Díli, Maskarinas, 17/06/2026) – Iha área Maskarinas, atividade produsaun Ekipamentu uma nian kontinua lao loron-loron ho apoiu husi máquina no trabalhador sira ne’ebé servisu hamutuk atu responde ba nesesidade merkadu nasional, husi produsaun kadeira, meza, armáriu, janela no arus odamatan, atividade ne’e sai parte importante husi esforsu atu promove indústria lokal no fortalese ekonomia Timor-Leste.
Tuir trabaillador Luis Carvalho, husi kompanhia ne’e, hateten atividade produsaun Sasán uma nian kontinua hala’o ho objetivu atu fornese produtu ho kualidade di’ak ba konsumidór sira iha rai laran.
“Ami kontinua produz kadeira, meza, armáriu, janela no arus odamatan ho kualidade di’ak atu responde ba nesesidade komunidade no merkadu nasional,” dehan Luis Carvalho iha Maskarinas 17/06/2026.
Tuir nia esplika, prosesu produsaun hahú husi selesaun ai ne’ebé forte no ho kualidade di’ak, Ai sira ne’e mai husi munisípiu oioin hanesan Manufahi, Ainaro no Covalima, ne’ebé durante ne’e sai fonte importante ba matéria-prima indústria mobiliáriu lokal.
“Ai sira ne’ebé mai husi munisípiu sira ami halo uluk sai papan no balok, depois foin tama ba prosesu produsaun tuir modelu ne’ebé kliente sira husu,” nia hateten.
Iha oficina ne’e, trabalhador sira ho kuidadu halo dezenu no modela produtu tuir pedidu kliente kada peça presiza tempu diferente atu remata, meza ida bele remata iha semana ida, enkuantu kadeira balu presiza to’o semana rua atu garante nia kualidade ne’ebé ho di’ak.
“Kadeira balu presiza tempu kleur liu tanba tenke hare detalhu hotu-hotu no halo ho didi’ak atu rezultadu final satisfaz kliente,” dehan Luis.
Depois husi prosesu modelasaun, produtu sira sei tama ba etapa lixamentu no pintura antes entrega ba kliente, ekipa tekniku halo verifikasaun kualidade atu asegura katak produtu remata tuir padraun ne’ebé determina ona.
Luis Carvalho hateten pedidu kliente sira mai husi fatin oioin no depende ba dezenu no medida ne’ebé sira hakarak, tuir nia, folin produtu mos varia tuir material no modelu ne’ebé uza.
“Atualmente meza ida ho medida aproximadu metru rua bele hetan folin hamutuk dolar amerikanu 180, maibé ne’e depende ba material no dezenu ne’ebé kliente hili,” nia hateten.
Além de fornese mobiliáriu ba merkadu nasional, emprenza ne’e mos sai fonte empregu ba juventude no trabalhador lokal sira Luis, maioria estaf sira mak ema Timor-Leste no simu oportunidade atu aprende abilidade teknika iha área karpintaria no produsaun Ekipamentu uma nian.
“Ami fó oportunidade ba juventude no komunidade lokal sira ne’ebé hakarak servisu noo kada fulan, Kompanhia ne’e seluho dolar amerikanu $130 ba trabalhador ida-idak,” nia hateten.
Maske hasoru dezafiu oioin, indústria ne’e kontinua iha kompromisu atu aumenta produsaun lokal no mantén kualidade, ho ne’e, sira espera bele kontribui ba dezenvolvimentu ekonomia nasional no hamenus dependénsia ba importasaun mobiliáriu husi rai liur.
Jornalista /estajiada :Domingas/Beatriz
Editor : Ana Maria da Silva
