(DILI), Delta Nova 15/06/2026 – Loron ida ne’ebé nakonu ho emosuan no kontente ba estudante sira ne’ebé remata ona sira-nia dalan akademiku iha Universidade Nacional Timor Lorosa’e (sigla-UNTL). Entre sira ne’e, estudante Fakuldade Ekonomia no Gestaun, Justa da Costa, mos sente orgullu bo’ot tanba konsege to’o iha etapa importante ida ne’e liu husi atividade judisiun ne’ebé realiza iha Delta Nova.
Entre estudante sira ne’ebé marka prezensa iha momentu importante ne’e, Justa da Costa, estudante husi Fakuldade Ekonomia Gestaun, la bele subar nia kontentamentu tanba konsege remata ona dalan akademiku ne’ebé nia hahú ho esperansa no determinasaun tinan balu liubá.
Ho laran haksolok no gratidaun, Justa da Costa hatete,judisiun ne’e la’ós deit atividade administrativu, maibé simboliza rezultadu husi luta, sakrifísiu no perseveransa durante nia moris hanesan estudante universitaria.
“Ha’u sente kontente no orgullu tebes tanba ikus mai konsege remata ha’u-nia estudu, judisiun ne’e sai etapa importante ida ne’ebé hatudu katak ha’u no kolega sira konsege liu ona husi prosesu akademiku ne’ebé naruk tebes,” dehan Justa da Costa iha salaun Delta nova 15/06/2026.
Nia hatutan,durante tinan barak tur iha banku universidade, nia hasoru obstákulu oioin, hanesan ekonomia, presaun akademika, to’o difikuldade sira ne’ebé dala ruma halo nia sente atu para maibé ho vontade forte atu alkansa nia mehi, nia kontinua esforsu to’o ohin nia bele tamba ba judisiun.
“Loron balu iha momentu ne’ebé difisil tebes, no responsabilidade sira seluk, dala barak halo ha’u sente susar, maibé ha’u hanoin nafatin katak edukasaun mak dalan ida atu muda moris no realiza mehi sira,” nia hatete.
Justa deklara, judisiun mos sai oportunidade ida atu rekuiñese esforsu no dedikasaun estudante sira durante sira-nia vida akademika. Nia fiar katak koñesimentu no abilidade ne’ebé hetan iha universidade sei sai kapitál importante ida atu kontribui ba dezenvolvimentu nasaun.
Nia salienta tan katak iha tempu sira ne’ebé nia sente kolen ka enfrenta problema, família mak sempre fo forsa morál no apoiu atu nia bele kontinua estuda.
“Ha’u-nia aman no inan sempre fó motivasaun no apoiu ba ha’u, sira sakrifika barak atu ha’u bele estuda, tanba ne’e, susesu ida ne’e la’ós deit ha’u-nian, maibé susesu ba ha’u-nia família tomak,” dehan nia ho sentimentu gratidaun.
Nia mos hatutan tan katak judisiun sai oportunidade ida atu rekuiñese esforsu estudante sira ne’ebé durante tinan barak dedika-an ba estudu no dezenvolve sira-nia kapasidade iha área ida-idak.
“Universidade la’ós deit fatin atu aprende teoria, maibé mos prepara estudante sira atu sai rekursu umanu ne’ebé bele responde ba nesesidade nasaun nian ha’u hakarak uza koñesimentu ne’ebé hetan atu fó kontribuisaun ba dezenvolvimentu rai ida-ne’e,” hatutan nia.
Iha nia mensajen ikus, Justa hato’o liafuan agradese ba ema hotu ne’ebé akompaña nia jornada akademika husi hahú to’o remata.
“Ohin loron ida ne’e importante tebes ba ha’u no kolega judisiun sira hotu, judisiun ne’e sai prova katak luta, pasiensia no perseveransa sei lori ita ba susesu ha’u agradese ba aman, inan, família, profesór sira, no maluk hotu ne’ebé fó apoiu durante tinan barak nia laran ha’u espera katak koñesimentu ne’ebé ha’u hetan bele ajuda dezenvolve Timor-Leste no fó futuru ida ne’ebé diak liu ba gerasaun sira tuirmai,” nia hakotu
Jornalista/Estajiada: Sandra/Domingas
Editor Ana Maria da Silva
