(Díli), Bidau 17/08/2026 – Joven Silviano Gomes, vítima ne’ebé hetan tiru iha kabun, hakotu ona iis iha Hospital Nacional Guido Valadares (HNGV), Dili, iha segunda-feira, 17 Agostu 2026, tuku 09:00 dader, depois de hetan tratamentu intensivu durante loron rua.
Mate-isin Silviano Gomes sei submete ba prosesu autopsia medida ne’e halo atu ajuda autoridade relevante hetan evidensia médika-forénsika no informasaun ne’ebé bele ajuda klarifika kazu ne’ebé akontese.
Representante familia matebian, Elizario Da Silva, hateten katak familia respeita prosesu tuir lei no prontu atu koopera ho autoridade, inklui autoriza autopsia, tanba familia hakarak faktu kona-ba kazu ne’e klaru no prosesu bele lao tuir dalan legal.
“Nia mate ona klaru ami familia nia prosesu ne’e tenki tuir lei karik matebian mak sala mos, la buat ida, maibé prosesu ne’e tenki to’o tribunal mak deside ami familia nia hakarak buat hotu tuir lei ohin polisia mai ona koalia ho ha’u atu autopsia ha’u autoriza autopsia bele hetan evidensia ruma, karik prosesu ne’e lao ba oin, dehan Elizario Da Silva iha Bidau 17/08/2026
Elizario mos hatutan katak, ba familia, prosesu legal importante tebes atu determina responsabilidade no faktu sira iha kazu ne’e familia, tuir nia, la hakarak halo julgamentu antes autoridade kompetente no tribunal halo desizaun bazeia ba evidensia no lei.
Agora dadaun, mate-isin Silviano Gomes tau hela iha mortuariu HNGV, akompaña husi familia no ekipa Polisia Forensika ekipa sira sei halo preparasaun no koordinasaun atu realiza prosesu autopsia.
Autopsia ne’e espera bele fó informasaun importante kona-ba natureza kanek, efeitu kanek no fator médiku ne’ebé relasiona ho matebian nia mate informasaun husi prosesu forénsika bele sai evidensia ida ba autoridade sira iha investigasaun kazu.
Tuir informasaun ne’ebé fornese, kazu ne’e akontese iha Sabado, 15 Agostu 2026, iha tuku 08:30 OTL iha momentu ne’ebá, Silviano Gomes reportedly konduz motor no la uza kapasete.
Iha situasaun ne’e, membru PNTL ida reportedly tiru Silviano Gomes iha parte kabun depois de akontesimentu ne’e, vítima hetan tratamentu médiku no tama iha HNGV atu simu tratamentu intensivu.
Depois de hetan tratamentu durante loron rua, Silviano Gomes ikus mai hakotu iis iha segunda-feira dader, iha tuku 09:00.
Maske vítima agora hakotu ona iis, autoridade sei presiza halo investigasaun kompleta atu klarifika kronolojia husi inísiu akontesimentu, sirkunstánsia iha fatin, no fator sira ne’ebé relasiona ho tiru ne’ebé akontese.
Familia matebian liu husi Elizario Da Silva enfatiza katak sira nia pozisaun mak atu entrega prosesu ba autoridade kompetente no garante katak investigasaun lao tuir lei.
Familia mos autoriza autopsia tanba konsidera prosesu forénsika importante atu bele hetan evidensia ne’ebé presiza no ajuda autoridade sira determina faktu kona-ba matebian nia mate.
Agora, familia sei hein rezultadu husi prosesu autopsia no investigasaun autoridade sira. Desizaun kona-ba responsabilidade iha kazu ne’e sei depende ba evidensia no prosesu legal ne’ebé sei lao tuir lei.
Jornalista: Dina/Sandra
Editor: Ana Maria da Silva
