Díli, Kolmera, 16/07/2026 – Prokuradór-Jerál Repúblika (PJR) realiza serimónia tomada de posse ba Ofisiál Justisa foun hamutuk na’in 16, ho objetivu atu hametin kapasidade institusionál Ministériu Públiku no asegura administrasaun justisa ne’ebé efikáz, imparsiál no profissionál. Serimónia ne’e marka etapa importante ida iha esforsu institusaun nian atu hasa’e kualidade servisu públiku no reforsa sistema justisa iha Timor-Leste.
Iha abertura ba serimónia ne’e, Prokuradoria-Jerál Repúblika hato’o agradesimentu ba autoridade sira, membru setór justisa no konvidadu hotu ne’ebé marka prezensa hodi fó apoiu ba eventu importante ida-ne’e.
Iha nia diskursu, Prokuradór-Jerál Repúblika, Dr. Nelson de Carvalho, hateten katak tomada de posse ne’e la’ós de’it atu simu Ofisiál Justisa foun sira ba servisu, maibé sai mós oportunidade atu reafirma kompromisu Ministériu Públiku hodi kontinua hametin administrasaun justisa no servisu públiku.
“Ministériu Públiku hanesan magistratura autónoma ida ne’ebé iha misaun atu defende legalidade demokrátika, hala’o asaun penál, reprezenta Estadu, proteje direitu no interese lejítimu sidadaun sira, no kontribui ba konsolidasaun Estadu de Direitu Demokrátiku”. dehan Dr. Nelson de Carvalho, iha Colmera, 17/07/2026
Dr. Nelson de Carvalho mós salienta katak susesu instituisaun la depende de’it ba servisu majistradu sira, maibé mós ba profesionalizmu, dedikasaun no kompeténsia Ofisiál Justisa sira. Tuir nia, sira mak iha papél estratéjiku atu garante tramitasaun prosesu sira, organiza sekretaria, hala’o notifikasaun, prepara dokumentasaun administrativu no fó apoiu tékniku permanente ba majistradu sira.
Nia hateten tan katak kualidade servisu Ofisiál Justisa sira sei fó impaktu direta ba efikásia investigasaun kriminál, lalais prosesamentu kazu sira no hasa’e konfiansa públiku ba sistema justisa.
Iha okaziaun ne’e, PJR reafirma katak Ofisiál Justisa hotu-hotu tenke hala’o sira-nia dever ho legalidade, imparsialidade, segredu profissionál, lealdade institusionál, responsabilidade, dilijénsia no disponibilidade atu serve Estadu no povu.
“Halo ita-bo’ot sira-nia funsaun ho onestidade, integridade, imparsialidade, profesionalizmu, responsabilidade no espírito servisu ne’ebé aas, hodi hametin Estadu de Direitu no aumenta konfiansa sidadaun sira ba justisa,” dehan Dr. Nelson de Carvalho.
PJR garante mós katak Ministériu Públiku sei kontinua investe iha formasaun, atualizasaun no dezenvolvimentu kapasidade Ofisiál Justisa sira atu bele responde ba dezafiu sira ne’ebé kontinua mosu iha setór justisa.
Iha remata diskursu, Prokuradór-Jerál Repúblika hato’o rekoñesimentu ba família no belun Ofisiál Justisa sira ne’ebé fó apoiu durante prosesu rekrutamentu no formasaun. Nia enkoraja Ofisiál Justisa foun sira atu hala’o sira-nia knaar ho onestidade, integridade, imparsialidade, profesionalizmu, responsabilidade no espíritu servisu públiku.
“Ministériu Públiku la depende de’it ba servisu majistradu sira, maibé mós ba profesionalizmu, dedikasaun no kompeténsia Ofisiál Justisa sira, tanba sira mak garante funsionamentu regular instituisaun no apoiu permanente ba administrasaun justisa.” Nia hakotu
Jornalista/Estajiária: Josefina Maria Freitas Desá
Editór : Felisberto F. Da Costa
