(Díli), Komoro, 17/07/2026 – Exelénsia Ministru Agrikultura, Pekuária, Peskas no Florestas (MAPPF), Eng. Marcos “MAMETA” da Cruz, MAgSt, realiza enkontru ho membru Parlamentu hosi Bali Indonézia ho objetivu atu hametin relasaun kooperasaun bilateral iha área agrikultura, pekuária, peskas no florestas.
Enkontru refere nu’udar oportunidade importante ba delegasaun rua ne’e atu fahe esperiénsia, diskute dezenvolvimentu setór agrikultura no buka dalan atu aumenta kooperasaun téknika entre Timor-Leste ho Indonézia. Governu espera katak kooperasaun ne’e bele fó kontribuisaun ba aumentu produtividade agríkola, dezenvolvimentu peskas no pekuária, no mós jestaun sustentável ba rekursu florestais.
Iha enkontru ne’e, Ministru Eng. Marcos “MAMETA” da Cruz aprezenta prioridade estratéjika MAPPF no esforsu governu hodi hasa’e kapasidade produsaun ai-han, garante seguransa alimentár, no promove dezenvolvimentu rurál liuhosi servisu hamutuk ho parseiru internasional sira.Tanba ne’e, MAPPF sei kontinua fó apoiu tékniku, fasilita asesu ba teknolojia agríkola, hadi’a sistema irigasaun, distribui fini no ai-moris di’ak, no promove formasaun ba agrikultór sira.
“Kooperasaun entre Timor-Leste no Indonézia iha setór agrikultura importante tebes atu fó benefísiu ba povu rua. Liuhosi troka esperiénsia, transferénsia teknolojia no servisu hamutuk, ita bele hasa’e produtividade no dezenvolve setór agrikultura ne’ebé sustentável,” dehan Eng. Marcos “MAMETA” da Cruz.uma adat MAPPF komoro.
Nia mós enfazia importánsia servisu hamutuk ho parseiru dezenvolvimentu internasional sira, ne’ebé durante tinan barak kontribui ona ba implementasaun programa agrikultura, konservasaun rekursu naturál, jestaun florestál, peskas, no kapasitasaun ba komunidade rurál sira. Tuir Ministru, kooperasaun ida ne’e sei sai xave atu asegura katak programa governu sira bele implementa ho efisiénsia no fó benefísiu direta ba komunidade.
Enkontru ida ne’e mós espera bele sai baze ba inisiativa kooperasaun foun entre instituisaun relevante sira hosi nasaun rua, partikularmente iha área investigasaun agríkola, dezenvolvimentu rekursu umanu, no promósaun investimentu iha setór agrikultura, pekuária, peskas no floresta
Jornalista/ Estajiada : Josefina Maria freitas Desá
Editóra : Ana Maria da Sailva
