(Díli), Largo Lecidere, 05/06/2026 – Timor-Leste selebra Loron Nasional Tasi ho objetivu atu proteje tasi no garante sustentabilidade ekonomia ba povu.
Iha eventu komemorasaun ne’e, Prezidenti Republika (PR),José Ramos-Horta, apelu ba publiku katak tasi mak riqueza bo’ot ba Timor-Leste no husu ema hotu atu proteje nafatin tasi husi foer ne’ebe soe arbiru.
“Tasi mak ha’u nia Timor, tanba ne’e husu ita hotu atu kuidadu no proteje nafatin husi foer, atu labele fó risku ba ita nia riku soin iha tasi laran,” dehan Prezidenti José Ramos-Horta, iha eventu seremonia loron mundial oceanu,largo lecidere,sexta 05/06/2026
Prezidenti mos hatete, katak kontenti ho realizasaun atividade Loron Nasional Tasi ne’e ho komunidade sira no espera katak iha tinan oin mai sei realiza nafatin eventu komemorasaun sira hanesan ne’e.
“Atividade ne’e sai hanesan loron espesial ida atu asegura sustentabilidade tasi no suporta dezenvolvimentu iha setor agrikultura no peska” nia salienta
Iha sorin seluk Estudante husi Eskola João Paulo II, Jenia Gonçalves da Silva, hatete nia kontenti tebes ho rezultadu ne’ebé sira hetan husi apresentasaun vestuariu resiklajen nebe sira uza.
“Ami la hanoin atu hetan oportunidade diak, maibé ikus mai ami bele hetan primeira lugar (I). Ida ne’e fó motivasaun ba ami atu halo diak liu tan iha futuru,” dehan Jenia.
Nia esplika,vestuáriu ne’ebé sira uza iha kompetisaun ne’e hatudu importánsia husi resiklagem lixu tamba lixu la’os buat a’at maibe bele uza ba sasan util.
“Liu husi vestuáriu ida ne’e, ami hakarak motiva ema hotu atu hatene no muda hanoin kona-ba lixu ne’ebé ita soe laiha konsiensia, tamba lixu ita bele muda ba buat foun balun” hatutan nia.
Iha parte seluk Koordenador Munisípiu Liquiçá, José António Gonçalves, hatete katak maski sira la sai vensedór, sira nafatin kontenti ho partisipasaun ida ne’e.
“Maski ami la sai vensedor ka manan nain, maibe ami nafatin kontenti tanba kompetisaun ne’e iha lakon no manan,” dehan José.
Nia mos husu ba ekipa komisaun organizadora komemorasaun loron nasional oceanu inklui juri sira atu fó klaru liu tan kona-ba kritériu avaliasaun hodi nune’e sira bele hatene klean liu-tan.
Entretantu eventu ne’e envolve mos husi Munisípiu 13 hodi hatudu identidade kada munisípiu, no komisaun organizadora realiza mos kompetisaun hanesan, baku drum-band, uza vestuariu/roupa husi lixu ho modelu oioin no uza tais kultura husi munisipiu sira. Enkuantu kompetisaun uza roupa tradisional tais husi munisípiu sira rezultadu hatudu katak, Munisípiu Manatutu sai manan nain ba dahuluk (I), Munisipiu Ainaro manan nain ba daruk(II) no munisipiu Manufahi sai manan nain da-toluk (III). Iha ambito komermorasaun ne’e mós hetan partisipasaun maximu husi Governante sira inklui ho komunidade.
Jornalista/estajiada : Caryn Camões
Editor : Ana Maria
