(Díli),Kaikoli 25/06/2026– Portavoz Polísia Nasionál Timor-Leste (PNTL) Superitendente xefe polisia João Belo do Reis konfirma katak agente polísia feto ida ho inisial EPLM mate depois de deskonfia tiru nia aan rasik iha zona Matadouro, Díli, loron 24 fulan Juñu 2026.
Porta-voz PNTL hatete, Sentro Operasaun Polisia Nasional Timor-Leste (PNTL) simu informasaun kona-ba insidente ne’e iha oras tuku 9:30(OTL) kalan. Tuir dadus preliminár sira, vitima deskonfia uza kilat tiru nia aan rasik, no sofre kanek grave.
“Familia vitima sira lalais kontaktu ambulánsia atu halo salvamentu no lori vitima ba Ospitál Nasionál Guido Valadares (HNGV). Maibé, maske ekipa médiku halo esforsu tomak, vitima labele salva tanba hemorajia bo’ot no kanek grave iha parte kakutak”hateten Portavoz Polísia Nasionál Timor-Leste (PNTL) Superitendente xefe polisia João Belo do Reis iha konferensia imprensa ba jornalista sira,Kaikoli 25/06/2026.
Nia haktuir,atualmente isin-mate vitima sei dadaun iha HNGV hodi hein prosesu autópsia, ne’ebé sai hanesan prosedimentu obrigatóriu atu ajuda esklarese faktu sira kona-ba kazu ne’e.
Nia deklara,depois akontesimentu, ekipa Laboratóriu no Forénsiku (PNTL) tun kedas ba fatin akontesimentu hodi halo levantamentu, rekolla evidénsia, no halo dokumentasaun fotográfika no téknika.
“Departamentu Investigasaun Kriminal (DSIC) PNTL komesa ona investigasaun kriminal formal atu determina sirkunstánsia no motivu sira ne’ebé lori ba akontesimentu trájiku ida ne’e” nia hatutan.
Komandante-Jeral PNTL,hato’o sentidu kondolénsia ba familia vitima no kolega sira iha korpu (PNTL). Nia dehan, PNTL lakon membru ida ne’ebé durante ne’e hatudu dedikasaun no profesionalizmu iha serbisu públiku no manutensaun seguransa nasional.
“ investigasaun sei kontinua ho independénsia no transparénsia. Evidénsia hotu-hotu rekolla ona no sei analiza atu hatama iha prosesu investigasaun.”Nia subliña
Nia relata,relasiona ho uza kilat husi membru (PNTL), Komandu-Jeral lembra katak regra klaru eziste ona ne’ebé determina membru sira ne’ebé remata servisu labele lori kilat ba uma, exeptu ba unidade espesífika sira ne’ebé, tuir natureza servisu, hetan autorizasaun espesiál.
“PNTL husu públiku atu respeita privasidade familia vitima nian no labele halo konkluzaun sedu kona-ba kazu ne’e, tanba rezultadu ofisiál sei depende ba investigasaun no autópsia ne’ebé sei la’o hela” nia husu.
Enkuantu Polisia Nasional Timor-Leste (PNTL) kontinua asegura no fó informasaun ba públiku kona-ba dezenvolvimentu investigasaun ne’e, ho respeitu ba segredu justisa no direitu familia vitima nian.
Jornalista :Osterlia Muni
Editor :Ana Maria
