(Dili), Farol, 22/06/2026 – Iha uma ida iha Farol, Dili, tristeza no saudade domina ambiente tomak bainhira tempu lao ba loron aban, família husi Saudozu Fransisco Guterres “Lu-Olo” prepara hela fatin atu simu mate-isin eis Prezidente República ne’ebé sei fila mai Timor-Leste husi Malázia iha loron aban.
Iha laran ida ne’ebé seidauk simu realidade tomak kona-ba lakon ne’e, família kontinua organiza preparativu sira hodi fó ultimu adeus ba lider ida ne’ebé durante nia moris dedika an ba luta libertasaun no konstrusaun nasaun Timor-Leste.
Domingos Guterres, alin husi Saudozu Lu-Olo, hateten katak família simu notísia mate nian ho laran todan tebes nia esplika katak eis Prezidente hakotu iis iha kalan oras tuku 11 resin ida iha ospitál ida iha Malázia.
“Ami família agradese tebes solidariedade no apoiu husi Governu, partidu polítiku sira no povu tomak ba apresiasaun no respeitu ne’ebé fó ba ami nia aman no lider ida ne’e,” dehan Domingos iha falor nakonu ho laran tristeza.
Maske preparasaun sira la’o hela, família seidauk halo desizaun finál kona-ba fatin ne’ebé sei sai deskansa permanente ba Saudozu Lu-Olo Domingos, dehan desizaun ikus sei halo depois nia esposa fila mai Timor-Leste.
Tristeza ne’ebé sente husi família mos reflete iha liafuan husi biin no Saudozu Lu-Olo ho matan ben no laran taridu, nia konta katak durante tempu tomak família espera nafatin atu Lu-Olo rekopera no fila mai ho saúde di’ak.
“Ami maun-alin hamutuk nain walu agora maioria mate ona, hela de’it ami nain tolu agora ha’u nia alin mate tan ona, hela de’it ha’u ho ha’u nia biin-alin ida,” hateten nia ho triste
Iha parte seluk, veteranu luta libertasaun no kolega kleur husi Saudozu Lu-Olo, Lere Anan Timur, mos marca nia respeitu no condolénsia ba família nia lembra katak lider istóriku ne’e husik hela nia esposa no oan na’in lima, kompostu husi feto na’in tolu no mane na’in rua.
“Ita moris iha mundu ida ne’e tenke simu realidade bainhira lakon família ida, ita sente hanesan lakon buat hotu, maibé ida ne’e parte husi planu Maromak nian,” dehan Lere Anan Timur.
Agora, enkuantu rai tomak hein chegada mate-isin Saudozu Fransisco Guterres “Lu-Olo”, povu Timor-Leste prepara an atu fó ultimu omenu ba lider ida ne’ebé nia naran liga metin ho história luta libertasaun no marcha nasaun nian.
Fila mai ba rai ne’ebé nia ajuda luta no harii, Lu-Olo sei hetan despedida ikus husi família, kolega luta no povu ne’ebé durante tinan barak konsidera nia hanesan símbolu dedikasaun no servisu ba Timor-Leste.
Ekipa Media Mudansa
