(Díli), 23/06/2026 – Kadaver Eis Prezidente Repúblika Demokrátika Timor-Leste Francisco Guterres “Lú Olo”, to’o iha Rezidénsia Farol, familia hamutuk ho autoridade Estadu, veteranu no sidadaun barak marka prezensa hodi fó ultimu homenajen ba saudozu ne’ebé durante kontribui makas ba prosesu luta libertasaun nasional no dezenvolvimentu nasaun.
Iha intervista Jeneral Falur Rate Laek hateten, lakon saudozu “Lú Olo” lori sentimentu bo’ot ba nia no maluk sira seluk ne’ebe durante ne’e hamutuk iha prosesu luta libertasaun nasional.
“Sentimentu ida ne’e boot tebes ba ami tanba ami eskola hamutuk desde joven, halo rezisténsia hamutuk, susar hamutuk no depois ukun-an mós kontinua servisu ba nasaun. Lakon ida ne’e la’ós buat ki’ik, maibé lakon boot ida ba ami hotu,” dehan Falur Rate Laek iha Rezidénsia Farol.
Nia dehan tan katak mate nu’udar parte husi siklu moris ema nian, maibé legadu no valor ne’ebé saudozu husik hela sei sai hanorin importante ba jerasaun foun sira.
“Jerasaun ida tenki troka ho jerasaun seluk. Ita hotu sente triste, maibé ita espera katak nia klamar hetan dame no legadu ne’ebé nia husik hela bele sai inspirasaun ba ita hotu,” nia hateten.
Kona-ba kondisaun saúde saudozu nian, Falur Rate Laek esplika katak tuir informasaun husi ekipa médiku, saudozu hetan problema iha kurasaun. Antes ne’e, nia sei iha kondisaun di’ak no kontinua komunika normal ho familia no kolega sira.
“Familia hotu espera katak tratamentu no operasaun bele hadia nia saúde no nia bele fila mai ho kondisaun di’ak. Maibé notícia ne’ebé mai ikus mak notícia triste ida ne’ebé halo familia no maluk sira hotu laran moras,” nia dehan.
Iha parte seluk, veteranu Dignázio hateten, maske mate nu’udar realidade moris nian, lakon lider ida hanesan “Lú Olo” kontinua halo povu no veteranu sira sente triste.
“Ita hotu hatene katak ema mate ne’e normal, maibé ita triste tanba ita lakon lider ida ne’ebé iha papel importante iha luta libertasaun no harii nasaun. Nia mak ema ida ne’ebé fó nia an tomak ba povu no rai Timor-Leste,” hateten Dignázio.
Nia akresénta katak durante tempu funu iha gerilla ai-laran, sira hamutuk enfrenta difikuldade oioin no kontinua metin ba objetivu independénsia Timor-leste.
“Desde tempu rezisténsia ami la’o hamutuk no enfrenta susar barak. Agora ami lakon kolega no lider ida ne’ebé ami respeita tebes. Tanba ne’e, ami veteranu sira sente lakon boot ba ema di’ak ida,” nia dehan.
Entretantu to’o oras ne’e, povu no autoridade sira kontinua marka prezensa iha Rezidénsia Farol hodi fó últimu respeitu ba saudozu Francisco Guterres “Lú Olo” antes serimónia funerál ofisial. Atmosfera lutu no tristeza domina Rezidénsia Farol bainhira ema barak mai hodi fó respeitu ikus ba lider ida ne’ebé durante tinan barak kontribui ba independénsia no estabilidade Timor-Leste. Husi veteranu sira to’o autoridade Estadu, hotu-hotu hatudu sentimentu lakon boot ba figura ne’ebé konsidera hanesan símbolo rezisténsia nasional.
Jornalista/Estajiada : Cipriana Da Silva Soares
Editor :Ana Maria
