(Díli), Farol 02/06/2026 – Arcebispu Metropolitanu Díli, Dom Virgílio do Carmo da Silva, hatete nudar Timor-oan no mos Igreja katolika. Iha momentu nee ita sente lakon ho faleseu eis-Prezidente Repúblika Francisco Guterres ‘Lú-Olo’, ne’ebé ohin loron hamutuk iha fatin ida nee hodi fo sentidu omenajen hamutuk ho sarani Igreja katolika,nune’e atu agradese ba saudoso nia sakrifísiu hotu ne’ebé nia halo ba rai nee.
“Nia kontinua hodi harii rai ida nee no nasaun ida nee. Ami agradese ba buat ne’ebé nia halo iha rai doben Timor-Leste ida nee,”dehan Dom Virgílio do Carmo hafoin halo prestasaun omenajen ikus ba maktoban eis-Prezidente Repúblika Francisco Guterres ‘Lú-Olo’ iha residensia Farol Díli,23/06/2026 .
Arcebispu ne’e mos husu komunidade atu kontinua fó apoiu moral no espiritual ba família maktoban nian, liu-liu ba oan sira ne’ebé agora lakon sira nia aman.
“Agora mos ita mai iha fatin ida nee atu reza. Hanoin katak iha momentu hanesan nee família no oan na’in haat sira lakon sira nia aman iha momentu ne’ebé difísil tebes. Maibé ita nia prezensa hamutuk iha nee hatudu ita nia solidariedade, liu-liu hodi reza ba sira iha momentu susar nee, atu sira nia laran forte nafatin iha tempu triste ida nee,”nia dehan.
Dom Virgílio salienta, Francisco Guterres “Lú-Olo” sei hela nafatin iha povu nia hanoin hanesan lider ida ne’ebé povu hotu respeita no hare ho matan rasik durante nia servisu ba nasaun.
Iha parte seluk, Dom Virgílio informa katak família maktoban determina ona atu Bispu Baucau selebra misa funebre ba eis-Prezidente. Misa ne’e sei realiza iha loron sexta-feira oras 11:30(Otl) iha Igreja Katedral Díli.
“Família sira husu no determina katak Bispu Baucau mak sei halo misa iha loron sexta-feira oras 11 ho balun, iha Igreja Katedral. Hau labele halo misa ba maktoban tamba aban hau sei desloka ba Roma tanba Papa konvida atu partisipa iha enkontru ida, entaun hau tenki ba,”hateten Dom Virgílio.
Maske nune’e, nia enfatiza katak buat ne’ebé importante liu mak prezensa komunidade atu akompaña família iha tempu lutu ida nee.
“Buat ne’ebé importante liu maka ita nia prezensa atu hatudu ba sira katak sira la mesak maske susar ataka sira, maibé ita nafatin lao hamutuk ho sira,” nia konklui.
Ekipa Media Mudansa
