(Díli), Hudi-Laran, 24/06/2026 – ABC International Development organiza treinamentu kona-ba Abilidade Dijitál ba jornalista sira ne’ebé hala’o iha Salaun GEM Institute, Brandit All, Palm Business and Trade Centre, Hudi-Laran atividade ida ne’e sai nu’udar iniciativa importante atu hasa’e kapasidade no kompeténsia jornalista sira iha área dijitál liu husi treinamentu ne’e, partisipante sira hetan oportunidade atu aprende no dezenvolve abilidade teknolójika sira ne’ebé relevante ho nesesidade mídia moderna, hodi fortalese kapasidade komunikasaun dijitál no aumenta kualidade servisu jornalístiku iha era dijitál.
Treinamentu ne’e orienta husi formador nain tolu, inklui trener Will Tinaapple husi ABC International Development, ne’ebé fahe nia esperiénsia no koñesimentu kona-ba jornalizmu dijitál moderna jornalista sira agora tenke bele adapta-an ho realidade média ne’ebé muda lalais.
“Ohin loron, telemóvel sai ona ferramenta importante ida ba jornalista sira. Ho ekipamentu simples ida, jornalista bele produz kontéudu ho kualidade no distribui informasaun ba públiku ho lalais. Importante liu mak oinsá ita uza ferramenta ne’e ho kreatividade no responsabilidade jornalístika,” hatete formador Will Tinaapple iha Salaun GEM Institute, Brandit All, Palm Business and Trade Centre, Hudi-Laran 24/06/2026 .
Durante sesaun sira, partisipante aprende oinsá prepara enquadramentu di’ak, regula iluminasaun, grava áudio ho klaru no produz vídeo badak ne’ebé atrativu ba audiénsia dijitál. Sira mós simu orientasaun kona-ba narativa visual, ne’ebé ajuda atu transforma eventu simples ida sai istória ne’ebé interessante no fasil atu kompriende husi públiku.
Aleinde ne’e, jornalista sira aprende uza aplikasaun dijitál hanesan Mojo no Blackmagic Camera, ne’ebé bele ajuda iha prosesu produsaun no edisaun vídeo diretamente iha terrenu. Uzu aplikasaun sira ne’e konsidera importante tanba permite jornalista sira produz no haruka kontéudu iha tempu badak liu, liu-liu bainhira kobertura eventu urjente.
Ba partisipante sira, treinamentu ne’e la’ós deit oportunidade atu aprende teknika foun, maibé mós atu aumenta konfiansa an bainhira halo kobertura iha kampu.
“Ha’u aprende katak telemóvel ida deit bele sai estasaun média ki’ik ida. Agora ha’u kompriende liu tan kona-ba oinsá produz vídeo ne’ebé atrativu no profissional maski uza ekipamentu simples,” hatete ida husi partisipante sira.
Iha parte seluk, treinamentu ne’e enfatiza mós importánsia rapidez no pontualidade iha jornalizmu iha era dijitál, informasaun corre lalais tebes, nune’e jornalista sira presiza bele identifika ângulu importante husi istória ida no responde lalais ba eventu sira ne’ebé akontese iha komunidade.
Ho treinamentu ne’e, espera katak jornalista sira bele lori ba pratika koñesimentu ne’ebé hetan durante loron tolu ne’e, hodi melhora kualidade reportagem no kontribui ba dezenvolvimentu setor média iha Timor-Leste. Iha mundu ne’ebé teknolójia kontinua evolui, kapasidade atu aprende no adapta-an sai xave importante ba jornalista sira atu kontinua relevante no entrega informasaun kredível ba públiku.
Jornalista/Estajiada: Caryn Camões
Editor : Ana Maria da Silva
