(Díli)- 22/06/2026- Deklarasaun husi Prezidente da Repúblika Demokrátika de Timor-Leste Dr, José Ramos Horta Liu-husi konta Ofísial Presidência da República,Haktuir katak Presidente da República, Jose Ramos-Horta, hato’o kondolénsia ne’ebé kle’an liu ba esposa, oan sira no família hotu, hamutuk ho lideransa, kuadru no militante sira husi FRETILIN, ho falesimento husi Eis-Prezidente Francisco Guterres “Lu Olo”, iha ospital Prince Court, Kuala lumpur Malazia.
“Ha’u simu notísia ne’e ho triste tebes no konsidera Prezidente Repúblika Francisco Guterres Lu Olo nia mate nu’udar lakon boot ida ba Nasaun” hateten PR Ramos Horta iha konta ofísial.
Hatuir PR katak,durante nia halo visita badak iha nasaun Malázia husi loron 13 to’o 16 fulan-juñu, PR ba ospitál ne’ebé Prezidente Francisco Guterres Lu Olo hela iha unidade kuidadu intensivu. Hodi rona diagnóstiku kona-ba kondisaun saúde eis Presidente Francisco Guterres Lu Olo husi ninia médiku timoroan no ko’alia ho ninia kaben, Cidália Lopes Nobre Mouzinho Guterres.
“Ha’u hetan informasaun kona-ba gravidade hosi Prezidente Francisco Guterres Luolo nia kondisaun klínika. Tanba respeitu ba pasiente no família nia privasidade, bainhira fila mai Dili, ha’u dehan de’it ba jornalista sira katak ha’u ba ospitál hodi husu kona-ba eis-Prezidente Repúblika, Doutór Francisco Guterres Luolo nia saúde, sein elabora kona-ba nia kondisaun klínika. Ha’u privadamente fahe informasaun kona-ba Prezidente Francisco Guterres Lú Olo nia kondisaun krítiku ho lideransa másimu partidu nian”subliña PR.
Prezidente Francisco Guterres Lú Olo nu’udar patriota boot ida, líder sentrál ida ba luta libertasaun nian, líder partidu istóriku FRETILIN nian, no kaer kargu aas hotu-hotu Estadu nian.
Nia salienta, iha ona kontaktu ho Embaixadór Timor-Leste iha Malázia atu koordena asaun nesesáriu hotu-hotu, iha koordenasaun ho estrutura família no estadu nian, ba transporte mate-isin mai Timor-Leste
“Ha’u mós kontaktu ho AERODILI hodi prepara voo espesiál ba transporte mate-isin no membru família sira” nia hatete.
Prezidénsia Repúblika, iha koordenasaun ho órgaun estadu sira seluk, sei fó apoiu tomak no onra estadu nian ba Prezidente Repúblika Francisco Guterres “Lú Olo”.
Média Mudansa
