(Díli), Ai-Mutin, 18/05/2026 –Vitima eviksaun hamutuk ho Rede ba Rai realiza konferénsia imprensa iha Postu Penal Aimutin, hodi husu ezijénsia ba direitu no justisa.
relasiona ho eviksaun ne’ebé hasoru uma-ka’in 25 iha área Aimutin.
Eviksaun ne’e, tuir komunidade sira, hamosu insatisfasaun no preokupasaun tanba konsidera la tuir prosesu ne’ebé klaru no justu. Vítima sira, hamutuk ho Rede ba Rai, hatudu sira nia pozisaun liu-husi deklarasaun imprensa hodi husu atu respeita direitu moradia no garante justisa ba ema sira ne’ebé afetadu.
Tuir Diretór Rede ba Rai, Hortensio Veira, hateten katak situasaun eviksaun ne’e, tuir nia hanoin, la tuir prinsipiu boa governasaun iha Timor-Leste.
Nia mós akresenta katak iha informasaun kona-ba presaun iha nível polítiku sira iha prosesu jestasaun rai no eviksaun, no husu atu autoridade kompetente sira haree situasaun ne’e ho responsabilidade no transparénsia.
“Ha’u hanoin ita labele husik povu kontinua sai vítima. Ita presija haree situasaun ida ne’e ho justisa no responsabilidade,” dehan Diretór Rede ba Rai, Hortensio Veira foin lalais ne’e.
Nia mós apela ba komunidade sira atu kalma, tanba tuir nia prosesu komunikasaun ho autoridade sira sei kontinua atu buka solusaun ba problema ne’ebé mosu.
Entretantu relasiona ho eviksaun ne’e Vítima Domingas Pinto mós hatete tan katak, sira hela iha área refere desde tempu antigu, inklui tempu Portugés, no eviksaun ne’e hamosu tristeza boot tanba sira sente katak prosesu ne’e la justu.
“Antes ami hela iha ne’e, la fasil atu harii uma. Maibé ikus mai estadu sobu ho lalais no ami sente triste loos,” hateten nia.
Sorin seluk, vitima Julia Maria Belo, husu atu iha prosesu ne’ebé klaru liu-husi dialogu no notifikasaun ofisial antes eviksaun akontese.
“Ha’u husu ba autoridade sira atu halo karta eskrita no resposta klaru, tanba lia verbal de’it la sufisiente ba ami,” nia hateten.
Komunidade vitima eviksaun iha Aimutin kontinua husu ba autoridade sira atu garante direitu moradia, transparénsia iha prosesu, no dialogu ho komunidade, hodi evita konflitu sosial iha futuru.
Jornalista/ Estjiada : Cipriana Da silva
Editor : Ana Maria da Sailva
