(Díli) , Jardim 5 de maiu,07 /07/2026 – Fatin Públiku hanesan Jardim 5 de Maio, ne’ebé uluk sai fatin atu estuda, halimar no hakmatek ba komunidade, agora muda sai mós ba fatin buka moris ba negosiante ambulante barak iha sidade Díli maioria husi negosiante Mai munisipiu sira hodi fa’an ai-han, ai-fuan no produtu sira seluk ho objetivu katak hodi sustenta nesesidade basika familia nian.
Mudansa ne’e fó oportunidade ba negosiante sira, maibé iha tempu hanesan hamosu mós preokupasaun kona-ba ordenamentu no ijiene ambientál iha espasu públiku. Tanba ne’e, autoridade lokál prepara hela medida atu organiza atividade negósiu iha jardim refere.
Tuir Xefe Suku Motael, Luís António Viegas, hateten,Governu la bandu sidadaun sira atu buka moris, maibé atividade hotu tenki hala’o tuir regras atu espasu públiku bele nafatin di’ak ba komunidade.
”Ami fó hela avizu kona-ba regras ne’ebé autoridade sira fó no fó orden ba negosiante sira, liu-liu iha jardim sira ne’e. Ba negosiante sira, ita la bandu maibé kumpri regras ruma, sira mós tenki hetan karta autorizasaun hodi bele uza espasu públiku iha jardim refere.”hatete xefe suku Motael ba Jornalista Média Mudansa foin lalais nee
Xefe ne’e deklara, enkuantu negosiante sira nebe’e fa’an iha area jardim 05 de Maio tenki selu taxa maske ho montante nebe mak ki’ik maibe kontribui ba dezenvolvimentu kapítal.
“Negosiante sira mós tenki selu taxa hodi bele tuir rekizitus sira ne’ebé autoridade sira fó.”nia hatutan
Iha sorin seluk, negosiante ambulante Clara R. Sarmento,orijin husi munisipiu Baucau,dehan katak nia hili fa’an sasán iha Jardim 5 de Maio tanba merkadu ofisiál hanesan Taibesi no Manleuana fatin nakonu no iha ne’e nia fa’an hodi ajuda nia sustenta família nia nesesidade basika loro loron nian.
”Ami husu Governu labele impede atividade negósiu iha dalan ninin no husu komprensaun ba ami-nia esforsu atu dezenvolve ekonomia loroloron nian.”katak nia
Atividade negósiu iha Jardim 5 de Maio hatudu realidade ida ne’ebé balansu entre direitu sidadaun atu buka moris no responsabilidade atu fó espasu públiku nafatin ba ema seluk, no mos negosiante sira tenki organiza no halo Fatin nee sai mos no seguru.
Autoridade no negosiante sira espera katak ho regras ne’ebé klaru, atividade ekonomia bele kontinua lao di’ak no komunidade hotu bele hetan benefísiu.
Jornalista /Estajiada : Natália de Carvalho Gomes/Melania de Jesus
Editor : Ana Maria
