(Díli), UNITAL, Becora 10 /07/ 2026 – Polítika saláriu mínimu iha Timor-Leste tenke bazeia ba dadus no análize sientífiku, no konsidera simultaneamente bem-estar trabalhador sira no kapasidade empresa sira. Mensajen ida-ne’e hato’o husi José Da Cruz bainhira orador prinsipal bat ema refere iha semináriu sientífiku organizadu husi Faculdade Ciências Sociais e Polítikas (CISPOL), Universidade Oriental Timor Lorosa’e (UNITAL).
José Da Cruz esplika,saláriu mínimu nu’udar instrumentu importante ida husi polítika públika atu garante trabalhador sira hetan rendimentu ne’ebé bele responde ba nesesidade bázika família, inklui edukasaun, saúde no moris dignu. Nia dehan, bainhira implementa ho di’ak, saláriu mínimu bele aumenta poder sustenta komunidade, estimula konsumasaun doméstika no fó kontribuisaun ba kresimentu ekonomia nasional.
“Saláriu mínimu iha papél importante atu aumenta kualidade moris trabalhador sira no hametin poder sustenta família. Maibé, governu iha implementasaun polítika ida-ne’e tenke konsidera kapasidade empresa sira, no kondisaun ekonomia nasional atu kria balansu entre interese trabalhador no empregador,” hatete José da Cruz iha salaun UNITAL Becora 10/07/2026
Nia husu atu governu halo avaliasaun regular kona-ba produtividade, inflasaun, kustu moris no kapasidade setor privadu molok foti desizaun kona-ba atualizasaun saláriu mínimu. Tuir nia, polítika ne’ebé la bazeia ba evidénsia bele lori impaktu negativu ba investimentu, empregu no sustentabilidade empresa, liuliu ba empresa mikro, ki’ik no médiu sira.
José Da Cruz aumenta,formulasaun polítika saláriu mínimu presiza envolve governu, organizasaun trabalhador, asosiasaun empregador, akademiku no peskizador sira atu garante prosesu ida transparente no inkluzivu.
“Diskusaun kona-ba saláriu mínimu presiza bazeia ba dadus no análize sientífiku atu suporta desizaun polítika ne’ebé benefísia ba sosiedade. Polítika ne’ebé di’ak mak polítika ne’ebé hatene balansu interese ekonomia no justisa sosial,” dehan nia.
Entretantu durante semináriu, partisipante sira diskute mos kona-ba oinsá saláriu mínimu bele sai instrumentu atu hamenus pobreza, hasa’e produtividade no promove estabilidade sosial. katak kooperasaun entre governu, setor privadu no instituisaun akademika importante atu produz rekomendasaun polítika ne’ebé bazeia ba rezultadu peskiza.
Jornalista / Estajiada : Josefina Maria freitas Desá
Editor :Ana Maria
