(Díli), Unital Becora 10/07/ 2026 – “Impaktu Ekonómiku Liu Husi Kontribuisaun Taxa Tarifária iha Timor-Leste” iha semináriu sientífiku ne’ebé organiza husi Fakuldade siências Sociais e Polítikas (CISPOL), Universidade Oriental Timor Lorosa’e (UNITAL). Iha aprezentasaun,katak taxa tarifária iha kontribuisaun importante ba reseita Estadu, maibé mos bele fó impaktu direta ba presu merkado no atividade komérsiu, tanba ne’e governu presiza estabelese polítika fiskál ne’ebé ekilibradu.
Tuir orador Marta Da Silva, taxa tarifária hanesan instrumentu fiskál ida ne’ebé importante atu hasa’e reseita estadu no suporta programa dezenvolvimentu nasional. Maibé, implementasaun taxa ne’ebé la ekilibradu bele hamosu aumentu presu ba merkadoria importadu, ne’ebé ikus mai afeta poder sosa komunidade no atividade komérsiu iha merkadu doméstiku.
Nia dehan, katak governu tenke halo estudu kle’an antes determina taxa tarifária, atu bele proteje interese konsumidór sira no, iha tempu hanesan, asegura Estadu kontinua hetan reseita atu finansia programa prioritáriu sira.
“Taxa tarifária kontribui ba reseita Estadu, maibé mos bele iha impaktu direta ba presu merkadoria no atividade komérsiu. Tanba ne’e, husu ba governu presiza estabelese polítika fiskál ne’ebé ekilibradu atu proteje interese konsumidór sira no aumenta reseita Estadu,” dehan Marta Da Silva,Iha salaun Kampus UNITAL Becora 10/07/2026.
Marta mos hateten, análize ekonómika importante tebes atu ajuda Lider polítika sira halo desizaun ne’ebé suporta kresimentu ekonómiku sustentável. Nia haree, maski reseita Estadu aumenta, dezafiu hanesan dezempregu sei a’as no presiza atensaun husi governu.
Nia akresenta,transparénsia iha jestaun finansas públika no investimentu iha setor produtivu sira iha rai laran sei sai fator importante atu kria oportunidade servisu no hasa’e atividade ekonómika nasional.
“Governu tenke iha papel importante atu promove dezenvolvimentu iha rai laran, hasa’e atividade ekonómika, kria oportunidade servisu no garante transparénsia ba públiku. Ho nune’e, ekonomia Timor-Leste bele sai forte no sustentável,” nia husu.
Husi semináriu sientífiku ne’ebé organiza husi siensia sosiais e polítika (CISPOL)-UNITAL ho objetivu habelar diskusaun akademika kona-ba dezafiu no oportunidade dezenvolvimentu Timor-Leste. Semináriu ne’e involve direita husi estudante no dosente sira,hodi fahe hanoin no rekomendasaun ba dezenvolvimentu polítika, públika ne’ebé bele kontribui ba kresimentu ekonómiku inkluzivu no sustentável.
Jornalista / Estajiada : Josefina Maria freitas Desá
Editor :Ana Maria
