(Díli), Taibesi, 18/06/ 2026 – Iha sorin ida Merkadu Taibesi, José Amajiu de Araújo kontinua hala’o nia negósiu fa’an tais no roupa tradisionál ho determinasaun atu sustenta família no asegura futuru di’ak ba nia oan sira husi negósiu ki’ik ne’ebé hahú ho kapitál limitadu, agora nia konsege dezenvolve nia atividade komersiál no sai fonte rendimentu prinsipal ba família.
José Amajiu de Araújo hateten hahú negósiu ne’e ho osan dolar amerikano $19.000, ne’ebé uza atu sosa tais no roupa husi rai li’ur no fatin seluk, no osan ne’ebé halibur no rendimentu seluk ne’ebé nia rekolla durante tempu naruk.
“Hau hahú negósiu ida-ne’e ho osan reserva no rendimentu ne’ebé hau rekolla durante tempu naruk uusi ne’e mak hau uza atu sosa tais no roupa atu hahú fa’an iha merkadu,” dehan José Amajiu de Araújo iha Taibessi 19/06/2026
Nia mos hatutan katak durante tinan hirak nia hala’o negósiu, José admite katak nia hasoru dezafiu oioin, inklui mudansa presu merkadu no menus konsumidor iha tempu balu, maske nune’e, nia kontinua esforsu no halo jestaun ne’ebé di’ak atu mantén negósiu ne’e nafatin lao.
“Iha tempu balu kliente menus no presu sasan mos muda, maibé hau kontinua esforsu no organiza negósiu ho di’ak atu bele kontinua lao to’o agora,” nia hateten.
Rendimentu husi negósiu ne’e la’ós de’it ajuda sustenta moris loron-loron família nian, maibé mos suporta edukasaun oan sira parte husi lukru ne’ebé hetan, José uza atu selu propina eskola no nesesidade edukasionál sira seluk.
“Rendimentu husi fa’an tais no roupa ajuda tebtebes sustenta família, Hau mos uza parte husi lukru atu selu oan sira nia propina no nesesidade edukasionál sira, tanba negósiu ida-ne’e sai fonte prinsipal rendimentu família nian,” nia dehan.
Além de esforsu rasik, José mos hetan benefísiu husi programa finansiamentu husi SDSB, ne’ebé ajuda aumenta nia kapitál negósiu, durante programa ne’e, nia simu apoiu finanseiru hamutuk osan dolar amerikano $1.000 atu aumenta stok sasan.
“Programa SDSB ajuda tebes-tebes hau nia negósiu, osan ne’ebé hau simu ne’e hau uza atu aumenta stok sasan, no agora hau bele fa’an liu tan,” hateten José.
Ho kapitál adisionál ne’e, nia bele aumenta variedade no kuantidade tais no roupa ne’ebé oferese ba kliente sira tuir nia, tais balu ne’ebé sosa ho presu entre $25 bele fa’an fila-fali ho presu to’o $30 ka liu tan, depende ba kualidade no modelu.
Iha nia hanoin, determinasaun, jestaun finanseira ne’ebé di’ak no apoiu programa ekonomia hanesan SDSB importante tebes ba dezenvolvimentu negósiu ki’ik sira iha Timor-Leste.
“Ho determinasaun, jestaun finanseira di’ak no apoiu hanesan SDSB, negosiante ki’ik sira bele dezenvolve sira nia negósiu no hadi’a moris família negósiu tais ne’e la’ós de’it fó benefísiu ekonomia ba família, maibé ajuda mos preserva no promove kultura Timor-Leste liuhusi fa’an tais tradisionál ba komunidade no visitante sira,” nia hakotu.
Ekipa : Kobertura
Editor : Ana Maria da Silva
