(Díli), Aitarak laran, 19/06/2026 – Loro-loron iha área Aitarak Laran, Díli, Juaquim Pinto kontinua oferese sigaru ba kliente sira maske hahú nia negósiu ho kapital ki’ik no depende deit ba apoiu husi nia maun, nia nafatin halo esforsu no la para luta agora, negósiu ne’ebé nia hala’o tama ona tinan ida no konsege ajuda sustenta nia-an no família, liu-liu iha tempu difísil.
Juaquim, jovem ida husi Munisípiu Viqueque, konta katak nia hahú negósiu ne’e ho apoiu husi nia maun, ne’ebé sosa sigaru iha loja sira no entrega ba nia atu fa’an fali husi oportunidade simples ida ne’e, nia komesa harii nia fonte rendimentu rasik.
“Primeiru ha’u hahú ho apoiu husi ha’u nia maun nia mak sosa sigaru iha loja no fó mai ha’u atu fa’an agora tinan ida ona ha’u kontinua hala’o negósiu ida ne’e,” dehan Juaquim iha Aitaraklaran, 19/06 2026.
Tuir nia, perseveransa no atendimentu di’ak ba kliente sira sai fator importante ida ne’ebé ajuda nia mantein negósiu iha loron balu, nia bele hetan rendimentu di’ak, maske kompetisaun aumenta tanba ema barak mos hahú tama iha negósiu hanesan.
“Agora ema barak mos hahú fa’an sigaru tanba ne’e, kliente sira la hanesan uluk tan maibé kliente sira ne’ebé konese ha’u nafatin fila mai sosa iha ne’e,” nia hatete.
Maske haree progresu iha negósiu ne’e, Juaquim admite katak durante tinan ida nia hasoru dezafiu oioin kazu ema bosok no na’ok dala balu lori prejuízu ba nia negósiu maibé situasaun hirak ne’e la halo nia desanima.
“Dezafiu bo’ot ida mak ema balu bosok ha’u no mos iha ema na’ok maibé buat hirak ne’e la halo ha’u para ha’u kontinua esforsu atu servisu di’ak no mantein kliente sira nia konfiansa,” nia dehan.
Ba Juaquim, rendimentu husi negósiu ne’e la’ós deit atu sustenta moris loron-loron iha Díli, maibé mos sai forma ida atu ajuda família iha kampo nia sempre koko haruka osan bainhira inan no aman presiza apoiu.
“Ha’u kontente tanba bele ajuda ha’u nia apa no ama maske la bo’ot, maibé bainhira sira presiza no telefone mai husu ajuda, ha’u sempre esforsu haruka osan ba sira,” nia dehan.
Juaquim mos mai husi família ida ho maun-alin nain lima, kompostu husi mane na’in tolu no feto na’in rua iha família ne’e, ema rua deit mak konsege servisu ona, enkuantu balu sei iha nivel edukasaun básika nia rasik la konsege kontinua estudu ba ensinu superior tanba limitasaun ekonomia, no hili atu servisu hodi ajuda família.
Maske nune’e, nia la lakon esperansa iha futuru, nia hakarak dezenvolve negósiu seluk atu aumenta rendimentu no kria oportunidade servisu ba ema seluk.
“Ha’u hakarak iha futuru bele dezenvolve negósiu ida ne’e sai bo’ot liu tan no mos buka oportunidade atu hahú negósiu seluk,” nia hatete.
Ba nia, susesu la komesa ho kapital bo’ot, maibé ho vontade, perseveransa no apoiu família nia enkoraja juventude sira atu la tauk hahú ho buat ki’ik tanba oportunidade bo’ot dala barak hahú husi pasu simples sira.
Istória Juaquim Pinto reflete realidade juventude barak iha Timor-Leste ne’ebé hili servisu rasik no hala’o negósiu ki’ik atu sustenta família ho apoiu família, servisu maka’as no determinasaun, nia prova katak limitasaun laos obstákulu atu atinje objetivu no kontribui ba ekonomia família.
Jornalista : Osterlia muni
Editor : Ana Maria da Silva
