(Díli), Largo Lecidere, 08/07/2026 – Bainhira loron hahú sae no hamanas sidade Díli, Teresa de Jesus hahú hal’o nia servisu loron-loron no leba aifuan haleu dalan sira no loron ba loron, nia la’o husi fatin ida ba fatin seluk hodi oferese nia aifuan ba ema sira, ho esperansa katak osan ne’ebé nia hetan bele ajuda sustenta família no asegura futuru ba nia oan sira.
Nia hatete katak moris la mai ho fasilidade atu hetan moris di’ak, ita tenki halo esforsu no servisu ho laran-metin kada loron, nia hasoru dezafiu oi-oin hanesan loron manas, ain moras tanba la’o kleur, no dala barak hasoru mós sosa-na’in ne’ebé menus maske hasoru difikuldade hirak-ne’e, nia nafatin persevera hodi hala’o nia servisu no la hakfodak atu buka osan.
“Servisu hotu-hotu todan, maibé leba aifuan iha sidade laran hanesan buat ida ne’ebé ha’u tenke halo ha’u la sente moe, tanba ne’e servisu ne’ebé moos hodi hatutan ha’u-nia moris ho aten-brani,” dehan Teresa de Jesus iha largo licedere 08/07/2026.
Osan ne’ebé nia nia hetan kada loron la’ós deit atu kobre nesesidade uma-kain nian, maibé mós sai investimentu ba edukasaun nia oan sira nian, nia mos fiar katak eskola mak dalan ida atu muda futuru família nian.
“Osan sira-ne’ebé ha’u hetan husi leba aifuan ne’e, ha’u uza hodi sustenta moris loron-loron nian no mós ajuda selu ha’u-nia oan sira-nia eskola,” Teresa haktuir.
Nia hatutan katak rendimentu husi ninia serbisu la permaneti otu depende ba númeru ema ne’ebé sosa no kondisaun merkadu iha loron ida-idak.
“Kada loron, osan ne’ebé ha’u hetan la hanesan loron balu ha’u bele hetan dolár $10, loron seluk $20, no dalaruma bele to’o dolár $40,” nia dehan.
Maske bele hetan rendimentu ida-ne’e, nia admite katak klima manas no menus konsumidór sira dala barak halo nia la bele fa’an hotu ninia aifuan iha loron balu, nia tenke lori fila produtu sira ba uma.
“Dezafiu ne’ebé ha’u hasoru mak tenke la’o iha loron manas nia laran dalaruma ema ladún sosa ha’u-nia aifuan, to’o lokraik ha’u tenke lori fila aifuan sira-ne’e ba uma to’o aban dadeer ha’u tenke kontinua leba fali hodi bele hatutan moris ida-ne’e,” nia hateten.
Maske moris loron-loron nakonu ho dezafiu, Teresa la lakon esperansa ninia esforsu sai ezemplu katak servisu onestu, maske simples, bele sai dalan atu sustenta família no realiza mehi ba oan sira.
Nia hato’o mensajen motivasaun ba ema hotu ne’ebé mós luta atu sustenta família, atu labele rende ba difikuldade.
“Ha’u-nia mensajen ba maluk sira hotu keta moe atu buka osan ho buat ne’ebé lós hodi bele sustenta ita-nia moris,” nia hakotu.
Jornalista/Estajiada : Natalia Carvalho; Melania De Jesus
Editor : Ana Maria
