(Díli ) Largo De Lecidere 13/07/2026- Dezafiu moris la’ós fatór ida atu impede foin-sa’e sira atu susesu, ida ne’e mak ezemplu moris ne’ebé hatudu husi joven ho naran Ojorio Ribeiru, joven empreendedor ida husi Munisípiu Viqueque, Nia la rende ba moris hodi sustenta nia nesesidade loroloron, ajuda alin nia eskola, no apoia nia inan-aman liu husi bisnis/negosiu ki’ik hanesan hadia telefoni a’at iha área Largo de Lecidere, Dili.
Maski hasoru dezafiu barak, Ojorio ne’ebé hahú nia atividade negósiu ne’e husi tinan 2023 to’o agora (2026), kontinua hatudu dedikasaun a’as. Nia sai nu’udar ezemplu di’ak no inspirasaun ba joven sira seluk iha Timor-Leste, katak atu labele hein de’it serbisu husi estadu, maibé tenke kria rasik oportunidade aprende husi ransu no kolega atu hetan esperiensia foun,Ojorio hatete katak ninia matenek no motivasaun atu tama ba mundu bisnis ne’e la’os mai de’it husi kursu formál, maibé liu husi ransu, no mós aprende ho badinas husi kolega sira ne’ebé iha ona koñesimentu kmanek iha área kbiit dijitál nian.
“Motivasaun ne’ebé ha’u hetan liu husi esperiénsia husi kolega sira. Bu’at ne’ebé ha’u hetan bisnis husi kolega, aprende liu husi ransu kolega sira ida ne’ebé mak hatene hadiak telefone aat sira ne’e. Ha’u haree no dalaruma tur hamutuk fó motivasaun mai ha’u oinsa atu lori ha’u ba koñese saida mak bisnis,” dehan Ojorio ba jornalista Media Mudansa iha Largo Lecidere,13/07/2026
Rendimentu no Dezafiu Loroloron Kona-ba rendimentu loroloron nian, Ojorio esplika katak kliente sira ne’ebé mai la hanesan, Dalaruma barak, maibé dalaruma mós uitoan de’it, bazeia ba kondisaun ekonómika populasaun nian. Iha loron baibain, kliente ne’ebé mai hadia telefoni aat hamutuk na’in 4 to’o na’in 5 (máximu).
“Kada loron ida hetan osan $5 dolar, máximu $10 dolar. Ema mai ida de’it hetan $3 dolar. Osan ne’ebé ha’u hetan uza ba ha’u nia nesesidade, ajuda mós alin nia eskola, fó mós ba ha’u nia inan-aman nu’udar oan bo’ot ne’ebe iha responsabilidade mos ba familia uma laran” subliña Ojorio
Nia mos deklara,tenke simu realidade katak iha dezafiu boot, liuliu kuandu tempu ne’ebé Ema la mai, dalaruma halo nia labele lori netik osan centavos ida fila ba uma,pasiensia ho nune’e loron ida sei hetan fila fali.
“Difikuldade ne’ebé ha’u hasoru dalaruma ema la mai hadia telefone. Ha’u hein husi dader to’o lokraik, dalaruma fila fali ba uma de’it ho liman mamuk. Maibé ne’e la hamate ha’u-nia espíritu,” nia hatutan
Mensajen Ba Joven Timor-Oan sira Nu’udar joven foin-sa’e Timor-oan ne’ebé hamriik ho ain rasik, Ojorio lansa mensajen forte no kmanek ba maluk foin-sa’e sira seluk iha rai laran atu labele foti dalan ne’ebé sala, hanesan envolve iha violénsia ka konsumu sasán aat, maibé tenke kreativu hodi kria oportunidade serbisu rasik ba futuru ne’ebé naroman.
“Ita labele rende ba ita-nia moris. Ha’u hanesan joven ida ne’ebé hala’o bisnis/negosiu Hadia telefone a’at, labele hanoin ida buka problema maibé tenki buka moris hodi kontribui mós ba ita-nia família liuhusi bisnis kiik ida ne’e. Serbisu hotu-hotu di’ak, importante mak kria rendimentu ho dalan ne’ebé mós no onestu” nia hakotu
Jornalista /Estagiada : Natalia De Carvalho Gomes/ Melania De Jesus
Editor :Ana Maria
