(Dili), 19/05/2026 – Bainhira loron Restaurasaun Independénsia Timor-Leste besik ona, bandeira nasional mean-kinur mutin komesa haree iha fatin barak iha kapital Dili, iha bareira dalan ninin, labarik balu aproveita momentu ne’e hodi fa’an bandeira atu hetan rendimentu ba nesesidade loro-loron família nian.
Labarik sira ne’e hamri’ik iha lorron manas nia laran, iha área hanesan Portu Dili no estrada bo’ot sira, hodi oferese bandeira ba ema ne’ebé liu sira dehan atividade ne’e la’ós deit atu selebra loron históriku 20 de Maio, maibé mos atu buka osan ki’ik atu ajuda ami nia família no ami nia a’an.
Leonizio De Jesus, idade 12 no estudante Pré-Sekundáriu, hela iha Matadoru, dehan nia la’o ain husi uma ba Portu Dili atu fa’an bandeira durante Períodu selebrasaun independénsia nian.
“Ha’u hetan inspirasaun husi kolega sira seluk, bainhira to’o loron bo’ot Timor nian, sira sempre buka maneira atu hetan osan, entaun ha’u mos tuir sira atu fa’an bandeira hodi hetan osan rahun ruma,” dehan Leonizio bainhira ko’alia ho jornalista iha área Portu Dili.
Sorin seluk, Isabel Martins, idade 13 no estudante Pré-Sekundáriu, dehan sira mai husi bairro ida de’it no hamutuk fa’an bandeira tanba sente kontente no entuziasmu ho atmosfera selebrasaun independénsia nian.
“Ami la hetan obriga husi ema ida ami rasik iha iniciativa atu sosa bandeira no fa’an fila fali hodi hetan osan atu ajuda ami nia nesesidade,” dehan Isabel.
Nia hatutan katak sira mos sente kontente bainhira ema barak sosa bandeira , inklui vizitante balu ne’ebé para hodi foti fotografia hamutuk ho sira.
Fenómenu fa’an bandeira iha tempu selebrasaun independénsia sai parte ida husi realidade sosial iha Dili, ne’ebé hatudu katak maneira sira ne’ebe labarik sira uza aproveita oportunidade atu hetan rendimentu ki’ik no partisipa iha ambiente patriotismu nasional.
“Maski sei ki’ik, labarik sira ne’e hatudu espíritu servisu no domin ba nasaun liu husi bandeira ne’ebé sira fa’an iha bareira dalan ninin iha loron nia manas no difikuldade moris nian, sira kontinua luta atu ajuda família no selebra loron históriku Timor-Leste nian ho orgulho.”
Jornalista /Estajiada Riana Silva/ Sandra Ramo
Editor : Ana Maria da Silva
