(Díli) Salaun Ian Martin Infordepe- Serimónia lansamentu Pose daha’at ba Manorin nain hamutuk Atus rua-ne’en (206) husi Ensinu Pre-Eskolar no Ensinu Báziku.
Tuir Ministru Edukasaun Interinu, Domingos Lemos hatete, Serimónia tomada de pose marka foun ida ho signifikativu ne’ebé mak professor hamutuk atus rua ne’en (206) rekrutadu ba ensinu pré-eskolar momentu ne’ebé importânsia bo’ot ba progressu edukasaun.
“Professor sira ne’ebé ohin simu pose hatudu sira nia komprimisiu liu husi kompleta sira nia formasaun anterior ne’ebé kontéudu hanesan kurikulum ensinu pré-eskolar nian, estatutu funsaun públika, protesaun ba labarik sira pedalójica no jestaun literasia no númerasia, teknólogia informasaun no komunikasaun”, dehan Ministru Edukasaun Interinu, Domingos Lemos ba jornalista sira iha Salaun Ian Martin Infordepe, Tersa, 01/04/2025.
Tanba ne’e iha mós vizita ba eskola sira hodi hare’e prosesu aprendizajen ne’ebé disponível, preparasaun ministériu edukasaun ba kualidade futuru nasaun nian hodi asegura katak professor sira bele kontribui ba oan sira nia dezenvolvimentu, edukadór sira ne’e husi munisípiu hotu-hotu iha rai laran hatudu esforsu koletivu ida atu lori nasaun organidade ba teritoriu nasionál tomak,
“Tomada de pose ba profesional edukasaun dedikadu sira nu’udar pasu importante ida hodi hametin sistema edukativu hodi reprezenta faze iha sira nia moris, hanesan ohin formasaun preparatóriu ne’ebé ita simu tiha ona husi ministériu edukasaun katak responsabilidade ba professor sira nia koñesimentu nune’e mós atu esplika ba labarik no foinsa’e sira ho di’ak, professor sira tenki iha responsabilidade atu forma no hanorin labarik sira no haburas estudante ida-idak nia potensia ne’ebé la iha limite”, nia salienta
Governante ne’e hatutan, misaun ida ne’e onradu nakonu ho dezafiu sira maibé mós nakonu ho rekompensa sira hanesan parte fundamental iha ambiente aprendizajen ida ne’ebé seguru inkluzivu no estimulante, iha ne’ebé respeitu no buka koñesimentu buras iha labarik ida-idak ne’ebé tama iha sala de aula sira.
“Ministériu edukasaun reforsa ninia komprimisiu atu apoiu edukadór hotu-hotu iha teritóriu laran tomak atu servisu hamutuk hodi asegura ambiente aprendizajen no akesimentu estudante sira nian”, informa nia.
Nia mós fó hanoin nafatin ba professor sira ne’ebé mak simu ona tomada de pose termu aseitasaun professor ka manorin nain sira ba pré-eskolar halo ona juramentu buat barak ne’ebé mak imi jura ona iha imi nia termu de aseitasaun, imi ko’alia buat barak, imi jura ba lalehan, rai no matebian sira hotu katak esperensia ne’ebé mak imi iha kandidatu primeiru no segundu lao tiha ona katak imi servi rai ida ne’e iha kualker momentu saida de’it.
“Ohin koloka ba eskola ida la to’o semana muda ba fali eskola ida ne’e labele iha razaun, professores sira sempre iha razaun katak ha’u moras kondisaun fíziku la di’ak, tanba ne’e entre nain sanulu resin ualu (18) rezeita lakohi assina termu de aseitasaun ida ne’e signifika sira lakohi, ohin professor atus rua neen (206) mai simu tomada de pose signifika katak ita bo’ot sira prontu ona atu koloka iha ne’ebé de’it importante labele koloka iha Atambua, kuandu iha munisípiu sanulu resin ha’at (14) iha Timor laran tomak ne’e ita bo’ot sira iha direitu atu ba hanorin iha ne’eba”, hakotu nia.
Jornalista : Ekipa Média Mudansa
Editora : Sandi Belo
