(Díli) Manleuana– Asosiasaun Tane Juventude ho objetivu ida loke sentru formasaun atu kapasita foinsa’e sira nia kapasidade atu nune’e kontribui ba rai ida ne’e hodi redus númeru dezempregu iha Timor-Leste.
Iha entervista Diretór Ezekutivu Asosiasaun Tane Juventude (ATJ) Tiago Dos Santos hatete, objetivu atu loke formasaun ida ne’e tanba hanesan joven atu kontribui ba rai ida ne’e no mós redus dezempregu iha Timor-Leste no oinsá lori joven sira ba dalan ne’ebé mak di’ak.
“Objetivu husi Formasaun ne’e atu transforma edukasaun ba joven sira no kria mós empregu ba joven sira no oinsá lori joven sira ba iha dalan ne’ebé di’ak, sentru formasaun ne’e nia estudante barak mak ba servisu ona iha nasaun Korea no Australia, husi formasaun ida ne’e kontribui mós ba redus dezempregu iha ita nia rai”, dehan Diretór Ezekutivu Asosiasaun Tane Juventude (ATJ) Tiago Dos Santos ba jornalista Média Mudansa iha Edifisiu ATJ, Kuarta, 2/04/2025.
Diretór ne’e hatete, sentru formasaun (ATJ) hari’i iha tinan 2021 ho prosesu resjistrasaun ba iha NGO servisu hanesan organizasaun Naun Governamental, iha programa ne’e mak kapasitasaun ba joven sira auto empregu, oinsá mak lori sira ba iha formasaun ruma ka kria fatin ruma ba sira atu fó servisu ba sira nia a’an rasik.
“Iha sentru formasaun ne’e rasik iha departementu tolu (3) mak Hanesan, edukasaun hare’e liu ba iha kapasitasaun no programa sira mak hanesan agrikultura, konservasaun,Turízmu no advokasia”, dehan Diretór Ezekutivu (ATJ)
Sentru formasaun (ATJ) sira ne’ebé estudante mak kontribui rasik kada fulan estudante sira registu ho montante $15 dólar, uza ba uniforme no mós ba kartaun estudante, kustu kada fulan ba lian korea ho kustu $10 dólar no lian inglés ho kustu $8 dólar.
“iha centru formasaun ne’e ami nia formador humutuk nain lima (5) no nain rua (2) seluk ba ona servisu iha korea, no vensimemtu ba formador sira tuir kuantidade estudante nian”, hatete nia
Iha fatin hanesan estudante Anisa Sarmento hanesan estudante lian Korea hatutan, nia hahú iha fulan frevereiru nia laran foin atu tama ba fulan ida, maibé nia senti kontenti tebes bele aprende lian korea ne’e, oinsá atu lee no hakerek.
“Aparende iha ne’e di’ak tebes, karaik aprende iha ne’e hetan linguajen ne’ebé di’ak iha futuru oin mai ha’u hakarak aplai vaga sira iha rai-liur”, nia afirma
Entertantu estudante Anisa Sarmento, rekonmenda ba joven sira hotu katak aprende la’os iha eskola de’it, maibé bele aprende husi sentro formasaun oin-oin hanesan mós aprende língua Korea, karaik iha mehi atu ba rai liur, entaun presiza aprende língua sira ne’e atu nune’e bele halo komunikasaun ho di’ak.
Jornalista: Ekipa Média Mudansa
Editora: Gaudencia Belo
