(Lautém) Bee Moris Lospalos– Konselu Imprensa Timor-Leste realiza treinamentu Jornalizmu Ambiental ba jornalista sira husi Média ualu (8) ho objetivu atu hasa’e jornalista sira nia koñesementu kona-ba Jornalizmu Ambiental nian no fasilita jornalista sira hodi halo kobertura ba iha area protejidu sira iha Munisípiu Lautém.
Diretór Ezekutivu Konselu Imprensa, Antonio Dias hatete, meiu ambiente ne’e fasil lo’os atu ema estraga maibé defisil atu rekopera.
“ Ita hatene katak meiu ambiente ita atu estraga ne’e lalais maibé atu rekopera ne’e susar tebes, tanba ne’e presiza lideransa, tanba ne’e jerasaun ida agora tenke salva ambiente ida ne’e mak ita hanaran jornalizmu ambiental”, dehan Diretór Ezekitivu Konselu Imprensa Antonio Dias bainhira halo abertura ba treinamentu jornalizmu ambiental iha salaun Roberto Carlos, Munisípiu Lautém, Kuarta, 23/04/2025.
Diretór ne’e hatutan, jornalista sira mak sai ema ne’ebé pro ba ambiente no pro ba sustentabilidade ambiental.
“Jornalista mak ema ne’ebé pro ba ambiente no sustentabilidade ambientak, ita bo’ot sira sei tulun hodi salva meiu ambiente nune’e ita iha jerasaun tuir mai iha direitu mós ba goza meiu ambiente”, hatutan Diretór ne’e
Iha fatin hanesan Diretór Diresaun Analiza no Dezenvolvimentu Média, Alberico da Costa Junior, dehan, atividade ida ne’e asaun estratejiku ida Konselu Imprensa halo ho objetivu prinsipal rua (2), primeiru atu hametin kompetensia profisional jornalista nian oinsá kontribui ba objetivu jeral ne’ebé konselu lmprensa iha, segundu oinsá atu garante independensia jornalizmu iha kada redasaun média nian.
“Entaun treinamentu ida ohin ne’e atu atinji objetivu jeral ne’ebé Konselu lmprensa nia planu prinsipal lolos ba Jornalizmu Ambiental, entaun ita nia jornalizmu ne’e mai ho paradigma ida foun oinsá ita responde ho efetivu, tanba barak liu ita nia notísia mai ho ekonomia, polítika no liga barak liu ho sosiadade, maibé asuntu ambiental ne’e presiza paradigma ba jornalizmu ida foun tanba ne’e mak ita bolu jornalizmu ambiental”, informa Diretór Alberico iha nia diskursu.
Enkuantu Jornalista Domingas Viana husi STL News, agradese ba Konselu Imprensa ne’ebé mak fasilita sira hodi tuir treinamentu kona-ba Jornalizmu Ambiental.
“Primeiru ha’u hakarak hato’o agradese ba Konselu Imprensa Timor-Leste ne’ebé mak fasilita ona ami hodi tuir treinamentu ida nee, pessoalmemte mai ha’u kontenti hodi tuir formasaun jornalizmu ambiental ne’e tanba liu-husi formasaun ida ne’e bele haklean liu tan ha’u nia kapasidade iha mundu jornalizmu nian liu-liu iha area jornalizmu ambiental nian, formasaun ida ne’e atu kapasita jornalista sira oinsá bele halo kobertura klean liu ba iha meiu ambiente nian”, Tenik jornalista Domingas
Entretantu jornalista sira ne’ebé mak partisipa iha trinamentu ne’e kompostu husi Média Mudansa, Neon Metin, STL News, Lafaek News, RTTL, Hatutan.com, Timor Post no Rádiu Komunidade Lospalos, enkuantu treinamentu ne’e realiza durante loron tolu (3) hahú husi loron Kuarta 23 to’o Sexta 25/04/2025 iha Munisípiu Lautém.
Jornalista: Sandi Belo
Editóra: Quisânia Gleide
