(Díli) Lahane-maske udan no loron manas maibé nesesidade moris obriga inan Osula de Carvalho tenki esforsu a’an hodi ajuda nia laen fa’an sigaru iha dalan ninin atu bele sustenta familia uma laran no selu oan nia eskola
Negosiante Osula de Carvalho konta ba jornalista média mudansa katak, nia halo negosiu ne’e tanba nesesidade uma laran mak obriga nia tenki fa’an sigaru, pulsa no bee iha dalan ninin hodi suporta nia laen atu atende ba sira nia moris loro-loron nian.
“Ha’u mai fa’an sasan iha ne’e tanba nesesidade moris mak obriga, entaun ha’u tenki ajuda laen hodi fa’an sigaru pulsa no bee iha dalan ninin, maske tempu ida agora udan la para hanesan ne’e no dala ruma loron mós manas, maibé ha’u pasensia nafatin hodi fa’an ita nia moris mak hanesan ne’e ona”, dehan negosiante Osula de Carvalho ba jornalista média Mudansa iha, Lahane, Tersa, 25/02/2025
Negosiante ne’e deklara katak, osan ne’ebé nia halo negosiu kredit husi moris rasik ho montante $300 dólar husi rendimentu ne’e mak negosiante Osula sosa sigaru, pulsa no bee hodi fa’an atu bele hetan osan oituan hodi sustenta ba nesesidade uma laran nian.
“Durante ha’u fa’an sigaru ne’e kredit husi moris rasik ho montante $300 dólar hodi bele hala’o negosiu ne’e, no kada loron ha’u bele hetan rendimentu $10 ou 15 dólar, rendimentu ami hetan ne’e fulan-fulan ami sei selu ba moris rasik no balu ba nesesidade uma laran”, nia afirma
Nia informa, durante sira fa’an sasan iha dalan ninin iha difikuldade ne’ebé mak nia hasoru bainhira udan bo’ot sira fa’an iha udan laran, maibé nafatin esforsu ho pasensia nafatin hodi bele hetan rendimentu atu sustenta ba família uma laran.
“Ha’u hanesan fe’en tenki fahe tempu ba malu ho ha’u nia laen hodi bele fa’an sasan, ha’u fa’an iha loron no ha’u nia laen fa’an iha tempu kalan, no esforsu ne’ebé ami rua hamutuk hodi bele hetan rendimentu mais ou menus bele sustenta ba nesesidade uma laran nian, no ami rua ha’u nia laen fa’an hahú iha tinan 2012 to’o agora”, tenik nia
Entretantu negosiante Osula de Carvalho origem husi Munisípiu Viqueque Postu Administrativu Uatulari, Suku Afaloicai, Aldeia Dasuate, da-daun ne’e hela iha Lahane no hahú negosiu iha tinan 2012 to’o ohin loron.
Estajiada: Esperansa M.Moniz
Editora: Gaudencia Belo
