(Díli) Merkadu Lama-Negosiante Isac da Silva Gonsalves halo negósiu iha dalan ninin hodi sustenta nia nesesidade moris nian, tanba hakarak moris dependente lakoi depende ba inan aman no husi negósiu ne’e mak selu rasik nia kursu
“Ha’u halo negósiu ne’e hakarak sustenta ha’u nia nesesidade loron loron, ai-fuan ne’ebé ha’u fa’an uza rasik ha’u nia osan ba sosa hodi fa’an fila fali, ai-fuan ne’ebé ha’u sosa ho folin $16 dolar amerikanu, no fa’an fila fali ho folin $1.50 centavus, kada loron ha’u hetan rendimentu $15 ou 20 no osan ne’ebé mak ha’u hetan husi fa’an ne’e hodi selu ba ha’u nia kursu korea nian no osan bele hetan osan transporte nian’’,hateten Isac da Silva Gonsalves ba jornalista Média Mudansa iha merkadu lama, Kuarta, 26/02/2025.
Negosiante ne’e haktuir, difikuldade ne’ebé mak nia hasoru barak lo’os dalaruma tabele tuir bus, no nia tenki haksoit lalais ba bus laran atu nune’e pasajeirus sira bele sosa nia produtu, no dalaruma ema la sosa nia tenki fa’an husi dader to’o kalan.
“Antes ha’u fa’an apel sira ne’e sai husi uma dadersan madrugada mais ou menus oras 4 hanesan ne’e ami sai husi uma ona hodi fa’an ai-fuan sira ne’e, banhira ami hare’e mak bus sira husi Díli ba Munsípiu ami halai ba bus laran hatudu ai-fuan ba pasajeiru sira, balun hakarak hola balun lakoi hola ami pasiensia nafatin, ita joven ona labele depende ba inan aman de’it, ita esforsu a’an hodi buka osan”, nia afirma
Negosiante ne’e informa katak, benefisiu ne’ebé nia hetan durante ne’e bele sustenta ba nia moris loro- loron nian, hanesan joven lakoi defende ba inan aman sira.
“Ha’u nia rekomenda ba maluk joven sira ne’ebé mak iha uma de’it no hakarak depende liu ba inan aman, ha’u husu ba imi hotu tenke buka osan ho maneira saida de’it mak iha atu nune’e la bele depende ba inan aman, bainhira ita susesu ema sei dehan ita esforsu rasik mak sai susesu ida ne’e importante ita joven tenke hatene”, nia tenik
Entretantu negosiante Isac da Silva Gonsalves idade origen husi Munisípiu Viqueque, Postu Administrativu Ossu, Suku Uagia, Aldeia Uatumantuku, dadaun ne’e hela iha Bekora hala’o négosiu iha merkadu lama durante tinan naruk.
Estajiada: Isabel dos Santos / Esperansa Maia.
Editora: Gaudência Belo
