(Díli) Kampu Alor– Negosiante Leotani fa’an sigaru, bee, white cofee no Good day iha suku kampu Alor postu Administrativu Dom Aleixo Munisípiu Díli atu nune’e bele selu nia eskola, no uja ba presija loro-loron.
“Ha’u hala’o negósiu ne’e atu hetan osan para ba eskola no mós selu bemo wainhira ba eskola, no ajuda ha’u nia ama atu nune’e ha’u nia ama labele hasai ona osan mai ha’u, sasan ne’ebé ha’u fa’an mak hanesan sigaru, bee, white cofee no Good day”, dehan negosiante Leotania Nizia da Costa ba Jornalista Média Mudansa iha Kampu Alor, Kinta, 27/02/2025
Alende ne’e negosiante Leotania hahú negósiu ho osan montante $20 ba leten husi negósiu ne’e mak nia bele ajuda nia ama no selu nia eskola, tanba nia rasik lakohi atu depende ba ema seluk.
“Ha’u hahú fa’an sasan iha semana kotuk liu ba ne’e no ha’u hetan osan ajuda husi ha’u nia ama ho osan montante $20 ou $30 dólares amerikanu, rendimentu kada loron ne’ebé ha’u hetan ne’e mais ou menus $7 ou $10 dólares hanesan ne’e, husi osan sira ne’e mak ha’u bele halo ba buat ruma”, nia afirma
Negosiante ne’e haktuir, dezafius ne’ebé durante nia hasoru iha vida negósiu mak guarda Munisípiu sira duni no bandu, maibé nia esforsu nafatin hodi fa’an sasan tanba ezijensia husi nesesidade moris.
“Problema ne’ebé ha’u hasoru durante ha’u hala’o negósiu ne’e mak dalaruma guarda Munisipíu sira duni ami ba mai, tanba fatin ne’ebé ha’u fa’an ema bandu, maibé ha’u pasensia nafatin hodi fa’an no dalaruma ema la sosa, entaun ha’u tenke husu osan ba ama atu selu osan bemo ba eskola”, hatete Leotania Nizia da Costa
Negosiante ne’e haktuir, benefisiu ne’ebé nia hetan liu husi negosíu ki’ik ida ne’e bele ajuda hodi selu nia eskola, osan bemo, no mós nia presija loro-loron nian, iha parte seluk nia mós la presija husu osan ba iha nia ama.
Entretantu Negosiante Leotania Nizia da Costa ho idade sanulu resin sia (19), hala’o hela estudu iha Ensinu sekundáriu Jeral 4 de Setembru no da-daun ne’e iha klasse 12 Ano, orijen husi Munisipíu Manatutu, Postu Administrativu Laklubar, Suku Manlima no Aldeia Kalohan, da-daun ne’e hela ho inan Faluk no alin nain rua (2) iha Palapasu.
Estajiada: Isabel de J. dos Santos
Editora: Gaudencia Belo
