(Ainaru) Mudansa- Komunidade komunidade suku Maubessi António Mendonça antuziasmu partisipa iha Festival Kulturál Rabilau maibé atu furak liu husu ba governu atu instala bee moos no eletrisidade no kuda ai-oan hodi nune’e bele asesivél liu ba turista rai laran no liur.
Festival Kulturál Rabilau ne’ebé selebra hahu husi dia 16 to’o 18 Outubru ne’ebé mak realiza iha munisípiu Ainaru postu administrativu Maubessi Suku Maubisse, komunidade antuziasmu hodi partisipa iha Festival ne’e mesmu ho distansia do’ok.
“Festival Kulturál Rabilau ne’e ha’u sente kontente tanba Estadu liu husi governu halo dezenvolvimentu turismu kulturál iha ami-nia suku no bele loke dalan ona mai fatin ida-ne’e hodi vizitante bele mai vizita fatin turistiku ne’e,” Dehan komunidade António Mendonça ba jornalista Media Mudansa iha Rabilau, Quinta ne’e, 17/10/2024
Nia haktuir tan katak ho Festival Kulturál iha Rabilau ne’e hakarak rekomenda ba governu atu kontinua halo fatin ne’e sai turismu kulturál ne’ebé furak no matak iha suku ida-ne’e atu nune’e bele dada vizitante sira hodi mai iha fatin ne’e.
“Maibé presiza halo dalan ne’ebé di’ak nune’e vizitante bele asesu no mós atu furak liután iha Ainaru Rabilau, parte relevante presiza kuda ai-oan, dada bee-moos, eletrisidade nune’e furak no matak liután. Ba ha’u hanesan komunidade rai ida-ne’e hakarak Governu kuda ai-oan nune’e fó mahon ba ambiente no balada sira iha fatin ida-ne’e,”Nia Afirma .
Iha fatin hanesan, Domingas Mendonça mós sente kontente tebes-tebes tanba tinan ne’e governu bele selebra Festival Kulturál Rabilau hodi anima komunidade sira iha fatin Festival ne’e.
“Ha’u kontente los partisipa iha fatin ida-ne’e tanba tinan ida foin dala ida. Iha fatin ida-ne’e la’ós ami hosi suku ida-ne’e de’it maibé Munisípiu hotu-hotu konsentra hodi partisipa no loke feira ho produtu oioin. Ida-ne’e halo rame liután no lori turismu ida-ne’e ba mundu, nune’e ema bele hatene katak Rabilau iha mós fatin turistiku,” nia dehan
Alende ne’e nia dehan bele hatene kultura no kostume kada Munisipiu nian ne’ebé mai aprenzenta ida-ne’e labele para iha ne’e de’it maibé kontinua selebra nune’e komunidade bele diverte.
“Se bele halo instalasaun bee-moos no kuda ai-oan nune’e fatin ne’e matak no fó mahon ba ami,” Hakotu Nia
Jornalista: Gaudencia Belo
Editór : Veraka
