(Díli) Mudansa – Portá-voz Organizasaun Joventude Estudantil Sosialista Timor-Leste,(OJESTIL) Agostinho De Jesus Oliveira,hateten,konsidera asaun SEATOU halo bá negosiante ambulante sira la ho dignu.
Porta-Voz akresenta,nu’udar Estadu Direitu Democrátiku ne’ebé harii hosi luta popular ne’ebé envolve povo tomak nia partisipasaun,povo tomak hola parte iha prosesu Libertasaun barak sai vitima lakon buat hotu-hotu nu’udar sakrifisius atu liberta Pátria ho Nasaun.
“Organizasaun Joventude Estudantil Soacialista De Timor-Leste (OJESTIL) konsidera asaun SEATOU halo bá negosiante ambulante sira la ho dignu,tanbá baku rahun karosa,fakar hahan, povo tomak hola parte iha luta libertasaun ho objetivu atu bele moris livre husi presaun oi-oin, livre atu bele buka moris fila liman atu desenvolve vida familia eduka oan-sira ba futuru ne’ebe diak liu,”dehan Portá-voz Agostinho De Jesus Oliveira,ba Jornalista sira iha Jardim 5 de maio,Kolmera,Díli, kinta-feira (05/09/24).
Nia esplika, iha Konstituisaum Estadu RDTL konsagra liberdade no respeita Direitu fundamental povo tomak nian, liu-liu iha garantia espasu bá ema hotu bele servisu no bele hadia sira nia moris,iha artigu 6 Konstituisaun RDTL define objetivu lubun boot ida maka Estadu tenki garanta nia konkretizasaun garanta moris diak espíritual no material ba ema hotu.
“Ita foin ukun an liu tinan 22, ekonomia Nasional seidauk desenvolvidu ema hotu sei depende hela ba fundu minarai. Setor produtivos seidauk buras iha ita nia Nasaun, tanbá seidauk iha entendmentu komun ida entre lider timor-oan sira,situasaun iha area rurais seidauk permite sirkulasaun osan no’o setor Agrikultura, Pekuaria to’o artesanal seidauk desenvolvidu hodi bele providensia fontes rendimentu bá povo Agrikutor, halo jovens barak populasaun barak atu bele hadia moris familiar, desloka ( migra) mai sidades bobot, hanesan Dili hodi fila liman, loke kios, faan sasan iha dalan ibun, okupa rai ne’ebé maka Estadu nian,” Porta-Voz esplika
Nia afirma, Estadu hakarak oganiza sidade halo sai mós no furak hodi ema rai liur mai karik bele hare aspetu sidade ne’ebe mós nofurak atu bele atinje objetivu ida ne’e, akomapaña Governu liu hósi liman SEATOU nian halo eviksaun, muda povo husi fatin ne’ebe sira hela ba to’o halo negosiu bá.
“Dala barak ita assiste medida ne’ebé SEATOU foti hasorus povo kiik la Umanu no la komprende povo nia terus,iha asaun atuasaun barak halo povo sai vitima ekonomikamente to’o barak lakon sasan, lakon bens atu bele sustenta familia nia moris, povo kiik sente la seguru iha Nasaun ne’ebe nia kontribui ba liberta,”Nia relata
Nia afirma, n’uudar jovens-estudantes ne’ebé halibur-an iha OJECTL/OJESTIL nu’udar organizasaun Resistensia nian ne’ebé aktual iha Frente Klandestina lamenta tebes no la simu imperativu moral no obrigasaun istorika asaun ne’ebe ekipa SEATOU liu husi Guarda munisipiu Díli.
“Asaun desordeira violentu hanesan baku rahun kadeira no baku rahun produto lokal ne’ebé negosiante ambulante sira faan,asaun violentu ne’e halo labarik kiik sira ne’ebé akompaña nia inan-aman sira hodi buka moris hakfodak no sente traumatizadu, maske labarik sira tanis, halerik hakilar, ekipa SEATOU, liu-liu Guarda Munisipiu Díli kontinua harahun negosiante sira nia produto, harahun mós karosa ne’ebe fasilita no tula negosiante ambulante sira nia sasan, asaun ne’e viola Direitu fundamental povo kiik sira nian,” Porta-Voz ne’e la menta
Nia esplika, haree ba atuasaun ne’ebé akontese iha fatin barak haterus povo kiik sira,nu’u Joven-estudantes ne’ebé halibur an iha OJECTIL/OJESTIL hakarak aplea bá Orgaun Soberania atu foti medidas Sidade tenki mós-furak, maibé labele mós ka furak iha povo nia terus, halerik no’o susar.
“Governu presizaa kria uluk kondisaun ekonomia desenvolve stor produtivu iha area rurais, Suku no Postu hodi lori agrikultores sira fila bá sira nia knua hodi fila liman iha setor produtivu ne’e,Ministro Komersiu no Industria (MCI) tenki insentiva abertura merkadu kriasaun fabrika ka industria hodi absorve povo nia produto agrikula,ho kriasaun kondisaun bá Povo ida-idak sei fila ba nia knua no nia Postu hadia sira familia nia moris sidade bele ordenadu desurbanizadu,OJECTIL/OJESTIL aseita mudansas graduais, Umanas ne’ebé maka la haterus povo kiik sira ne’ebé vota iha Referendu bá liberta Rai ida ne’e,”dehan Nia
Aleinde ne’e, OJECTIL/OJESTIL nu’udar organizasaun resitensia aseita mudansa, maibé povo labele sai vitima bá desenvolvimentu Povo kiik tenki sai sentru bá kualker dezenvolvimentu fijiku, kultural no sosial hola parte ativu iha prosesu transformasaun ekonomia Nasional.
Jornalista: Ana Ribeiro
Editóra:Delfina Borges
