(Díli) Mudansa –Prezidente Asosiasaun Jornalista Timor-Leste (AJTL), Zevonia Vieira, liu husi konferensia Imprensa hateten, iha prosesu eviksaun ne’ebé Sekretáriu Estadu Assuntu bá Toponímia Urbana (SEATOU) halo jornalista barak mak sai ona vitima ba aktu seguransa SEATOU nian ne’ebé ameasa no bandu jornalista sira halo kobertura ba eviksaun.
Prezidente ne’e dehan,atu asegura Timor-Leste nu’udar país Demokrátiku ne’ebé la-falun ho rejime Autoritariu no ditadura, papél midia iha momentu ne’e nesesáriu tebes, liu-liu iha ambitu vizita Amu Papa nian hodi tranzmite informasaun loos no kredivel bá públiku kona-bá asuntu sosial sira durante vizita refere.
“Infelismente papel mídia informativu no papel mídia kontrolu sosial iha país Demokratiku dala barak ona hetan tentativa impedimentu no ameasa husi aparellu Estadu nian,durante prosesu preparasaun Estadu nian atu simu Amu Papa Francisco nia vizita iha tinan 2024 liu-liu iha prosesu eviksaun ne’ebé Sekretáriu Estadu Asuntu Toponomia Urbana (SEATOU) halo jornalista barak mak sai ona vitima ba aktu seguransa SEATOU nian ne’ebé ameasa no bandu jornalista sira halo kobertura bá eviksaun ne’e,”dehan Prezidente AJTL, Zevonia Vieira ba Jornalista sira liu husi konferensia Imprende iha sede AJTL Fatuhada,Díli,(05/09/24).
Prezidente AJTL ne’e esplika, garante no asegura Timor-Leste nu’udar pais Demokrátiku no garante boa governasaun no respeitu ba Direitu Umanu, kanál mídia no jornalista sira tenke Servisu iha ambiente ida ne’ebé livre, laiha ameasa no demokrasia bainhira laiha liberdade imprensa Demokrasia sei la moris no asegura Timor-Leste nu’udar país Demokratiku ida-ne’ebe livre.
“Laiha ameasa impedimentu husi entidade saida de’it iha país Demokratika ida, liberdade imprensa, de’it mak bele proteje Demokrasia, maibé ne’e autoritariu ka ditadura,tanbá ne’e, Asosiasaun Jornalista Timor Lorosa’e (ATL) ne’ebé durante ne’e halo advokasia hodi promove no hametin liberdade imprensa no liberdade espresaun iha país Demokratiku ida-ne’e’ haree katak aktu detensaun husi Polisia hasoru Jornalista Diligente, Antonia Kartono Martins no aktu hadau ekipamentu Jornalista Media One Timor, Suzana Cardoso nu’udar tentativa no ameasa hasoru liberdade imprensa no liberdade espresaun iha Timor-Leste, haktuir iha Konstituisaun RDTL, Artigu 40 no 41. Aktu violentu Polisia nian hodi detein jornalista no estraga jornalista nia ekipamentu kobertura nian konsidera mós nu’udar aktu sensura (cencorship) hasoru informasaun neʼebé jornalista sira rekolla antes públika hodi garente públiku nia Direitu ba asesu informasaun loloos no kredivel,”Nia relata
Nia husu bele ka la’e halo gravasaun bá situasaun ida akontese iha fatin públiku, la hó ema nia autorizasaun? hatan Bele,tuir Kódigu Sivil la presiza husu autorizasaun bá ema ruma bainhira halo gravasaun iha fatin públiku situasaun ho interese bá públiku, situasaun akontese ho natureza públiku, haree ba artigu 76, nú. 2 hosi Kódigu Sivil.
“Ema hotu-hotu bele halo gravasaun asaun akontese iha fatin públiku liu hosi foto, halo filmajen, la’ós jornalista de’it,karik ema ida iha fatin públiku lakoi tama ba gravasaun, nia presiza hases an hosi fatin refere foti asaun atu subar an halo gravasaun bá atuasaun entidade públika ruma iha fatin públiku la viola Lei ruma ka regra ruma, no la viola Direitu imajen hosi ofisiál refere,AJTL Konsidera fatin privadu mak uma no kareta laran ka eskritóriu privadu nian nomós área toba nian hosi Ospital no halo atendimentu médiku Eskritória entidade,” Tenik Nia
Nia Akresenta, halo publikasaun bá situasaun ida akontese iha fatin públiku?hatan: depende karik gravasaun bele rezulta “prejuizu danu bá onra, reputasaun hamoe” ema ne’ebé iha gravasaun laran, entaun sei iha opsaun rua hodi bele públika gravasaun no la viola direitu imajen ema nian.
“Públikasaun gravasaun ho ema nia autorizasaun, halo blur ema nian oin (karik identifika ho fasil ema),publikasaun bá atuasaun Autoridade públika hosi sidadaun bainbain sei la viola Direitu imajen bainhira interese públiku superior no la fokus ba ema nu’udar karáter pesoal/privadu, maibé bá atuasaun poder públiku nian,mós haree bá knaar jornalista iha sosiedade demokratika, jornalista bele públika gravasaun halo iha fatin públiku la ho restrisaun ruma,detensaun no impedimentu Polisia nian hasoru jornalista sira hakanek ona liberdade imprensa, valór demokrasia no Direitu Umanu iha Timor-Leste,”Nia subliña
Nia afirma,iha tempu neʼebé povu Timor-Leste prepara-an hodi simu amu Papa Francisco nia vizita iha loron 9 fulan setembru mai ne’e.
“Bazeia razaun sira temi iha leten AJTI hakarak hato’o nia pozisaun kontra no kondena aktu detensaun hasoru Jornalista Antonia Kartono Martins no impedimentu hasoru Jornalista Suzana Cardoso hosi PNTL eskudra Dom Alexo, tanbá sei hatauk jornalista no mídia iha tempu sira tuir bainhira hala’o sira nia papel kontrolu sosial iha país Demokátiku ne’e,konsidera detensaun no impedimentu hasoru jornalista nu’udar aktu represivu ida hodi hatauk jornalista sira bainhira halo sira ninia knaar jornalizmu iha kontestu kobertura no publikasaun notisia,” Nia esplika
Prezidenta hatutan, AJTL mós sei halo karta bá Prezidente Républika José Ramos Horta nu’udar mós laureadu Nobel da Paz no Primeru Ministru Xanana Gusmão kona-bá polisia nia aktu hirak ne’e.
“Tanba ameasa ona liberdade imprensa no liberdade espresaun iha ambitu Timor-Leste halo preparasaun atu simu Amu Papa,AJTL mós sei halo karta bá Prezidente Républika José Ramos Horta nu’udar mós laureadu Nobel da Paz no Primeru Ministru Xanana Gusmão kona-bá polisia nia aktu hirak ne’e AJTL mós sei prosesa kazu ne’e tuir Lei Komunikasaun Sosial, Artigu 41, nune’e fó efeitu legál hasoru entidade sira ne’ebé tenta hamate liberdade imprensa iha Timor-Leste,ho pozisaun ida-ne’e, AJTL husu ba Komandu Jerál PNTL atu fo hanoin bá ninia membru sira atu respeita mídia no jornalista bainhira sira hala’o atividade jornalizmu iha terreñu,tanbá Timor-Leste nu’udar país demokratiku, la’ós país autoritáriu,” Nia sujere
Nia husa ba Consellu Imprensa atu foti inisiativa hodi kontinua halo sosializasaun ba Lei Komsos, públiku no entidade sira Estadu nian atu komprende papél mídia iha sosiedade Demokratiku hanesan Timor-Leste, husu bá Sekoms atu komunika ho aparellu sira Estadu nian hanesan forsa SEATOU,liu-liu Polisia atu respeita mídia no jornalista nia servisu banhira halo kobertura ba asuntu sosiál sira neʼebé liga povu baibain sira nia moris.
“Jornalista sira no kanál mídia hotu-hotu iha rai-laran atu fó salidariade ba malu hodi kontinua públika kazu ne’e to’o hetan solusaun lolos no justu, jornalista no kanál mídia hotu atu nafatin kumpri Kódigu Étika Jornalistika, Lei Komunikasaun Sosial no prinsipiu sira jornalizmu nian bainhira hala’o knaar jornalizmu iha neʼebé deit atu nafatin asegura no garante liberdade imprensa no liberdade espresaun iha Timor-Leste, AJTL husu bá Governu no parte seguransa atu respeita jornalista sira nia kobertura durante Amo Papa Francisco nia vizita mai Timor-Leste, labele halo diskriminasaun bá media sira, no fo espasu ba jornalista sira atu halo sira nia movimentu atu halo kobertura tuir kada mídia anglu ne’ebé hakarak foti, nune’e laiha tentativa atu limite liberdade imprensa iha Timor-Leste, tanbá AJTL observa katak loron hirak nia laran ekipa konjuta sira tenta fó limitasaun bá jornalista sira atu asesu Tasi-Tolu hodi foti filmajen ka foto iha fatin refere, AJTL mós husu ba jornalista tomak atu kontinua kumpre kodigu étika jornalistiku no prinsipiu jurnalismu nian, hodi fo sai informasaun ne’ebe loos tuir interese públiku nian.”Prezidente AJTL Hakotu
Jornalista:Ana Ribeiro
Editóra :Delfina Borges
