(Díli) Mudansa- Prezidente Repúblika José Ramos-Horta, hateten, Sekretáriu Jerál Nasoins Unidas (ONU) prezensa iha Timor iha signifikadu espesiál ida, tanbá nia lideransa ezemplár iha Nasoins Unidas no bá papél ne’ebé hala’o hodi fó apoiu kauza nu’udar Primeiru-Ministru Portugal nian.
“ Bainhira ami selebra tinan 25 liberdade soberania no rekonsíliasaun nian, ami hanoin fali ami-nia Povu nia sakrifísiu sira,dalan ne’e naruk no todan, maibé ho apoiu husi komúnidade Internasionál, Nasoins Unidas no ninia ajénsia espesiálizada sira, ami konsege alkansa páz, estabílidade no dezenvólvimentu ne’ebé ohin loron sai realidade iha Timor-Leste,Sekretáriu Jerál Nasoins Unidas (ONU) prezensa iha ami nia leet iha signifikadu espesiál ida, tanbá ita boot lideransa ezemplár iha Nasoins Unidas no bá papél ne’ebé hala’o hodi fó apoiu ami nia kauza nu’udar Primeiru-Ministru Portugal nian,”dehan PR liu husi Diskursu, hafoin jantar hamutuk iha Palacio Nobre Lahane, Kinta-Feira (29/08/24)
Nia hatutan, sira moris iha mundu ida ne’ebé Globalizadu no interdependente bá bebe’ik, marka ho inserteza, konflitu armadu, pandemia, inseguransa ai-han no fenómenu naturál estremu ne’ebé rezúlta husi mudansa klimátika.
“Nesesidade atu hetan solusaun negosiada ida bá kestaun Sahara Osidentál, tuir rezolusaun sira hosi Asembleia Jerál Nasoins Unidas, hosi Konsellu Seguransa ONU no hosi Uniaun Afrikana, ho sorte Timor-Leste sai nafatin oázis ida bá dame, toleránsia no seguransa,reviata Economist no Freedom House nia Democracy Index klasifika Timor-Leste nu’udar livre no Nasaun ne’ebé demokrátiku liu iha Súdeste Aziátiku,” PR Horta esplika
PR salienta, iha tinan 2023, Índise Liberdade Imprensa Mundiál husi Media Watch ne’ebé fó sai hosi reporter sira ne’ebé laiha Fronteira, koloka sira nia Nasaun iha pozisaun sanulu iha Mundu tomak (Top 10), iha Nasaun dezenvólvidu oi-oin no Demokrásia osidentál sira nia oin.
“Ami-nia forsa defeza no seguransa Falintil Forsa Defeza Timor-Leste (F-FDTL) no Polisia Nasional Timor-Leste (PNTL) hanesan motivu orgullu ida bá sira-nia profisionálizmu no respeitu bá Instituisaun sivíl sira, no ba Direitus Umanus ami nia sidadaun sira-nian,ami hanesan sosiédade ida multikulturál, multi-relijioza, multilingue no multiétnika, ami iha kompromisiu bá ami nia diversidade Direitu no liberdade fundamentál sira hetan vitória, hodi permite kresimentu no dezenvólvimentu armoniozu, maski nene’ik, bá ami-nia sidadaun sira, setór privadu no organizasaun sira sosiédade sivíl nian.” PR Horta Hakotu
Jornalista : Ana Ribeiro
Editóra : Delfina Borges
