(Dili)-Mudansa-Isabel Soares da Cruz hatete, nesesidade moris ejiji nia tenki halo kreditu osan iha Grupu Moris Rasik ho dollar (300. 00) hodi halo negosiu responde ba nesesidade kada loron.
Tuir negosiante Isabel Soares da Cruz hateten, nia hala’o negosiu ne’e,tanbá moris nesesidade uma-laran ejiji tenki buka rasik hodi hatan bá moris ne’ebé mak hasoru.
“Ha’u hala’o negosiu ne’e,tanbá moris ejiji tenki buka rasik hodi responde ba nesesidade kada loron moris ida agora ne’e presu bá merkadu mós folin sa’e makas, entaun ami sosa labele no servisu mós laiha ami tenki halo negosiu ki’ik sira hanesan ne’e,nesesidade moris ejiji nia tenki halo kreditu osan iha Grupu Moris Rasik ho dollar (300. 00) hodi halo negosiu responde ba nesesidade kada loron,dehan negosiante Isabel ba Jornálista Mudansa iha area ai-mutin,kinta-Feira,(01/08/24)
Negosiante Isabel akresenta,tenki buka dalan tama iha grupu foti osan (kredit) iha grupu Moris-Rasik osan ho montante, dollar atus-tolu ($300.00) hodi fó moris bá halo negosiu kiik ne’e, osan ne’ebé foti (Kredit) iha Grupu Moris-rasik kada semana tenki bá estór.
“Ami foti osan iha moris rasik etapa premeiru ami foti dollar atus-tolu ($300.00), etapa segundu dollar atus-neen ($600.00) iha etapa premeiru ne’e ha’u foti dollar atus-tolu ($300.00), mak hodi sosa sasan sira hanesan kafé, Masi-midar, Pop-Mei, Good-day, no biskoit sira ne’e, maibé kada semana tenki bá estór dollar sanulu resin-tolu, sentavus lima ($13.0,5), maibé depende ita foti osan ne’e, hanesan etapa premeiru ne’e ha’u estór dollar sanulu resin-tolu, sentavus lima ($13.0,5),” Nia subliña
Nia konta, halo negosiu ne’e ida ne’e de’it ona,tanbá tuir ha’u nia forsa no kbi’it, rendimentu ne’ebé hetan kada loron ne’e depende bá ema sosa de’it, no tuir nia tempu.
“Ha’u hakarak kontinua ho negosiu ne’e de’it ho forsa ne’ebé mak ha’u iha no ema sosa tuir tempu ne’ebé iha tuir tempu no rendimentu ne’ebé ha’u hetan kada loron ho dollar rua-nulu ($20.00) ka rua-nulu resin-lima ($25.00) no tempu ne’ebé mak ladi’ak mak kada-vez ha’u heta dollar sanulu ($10.00) to’o dallar sanulu resin-lima ($15.00) dala ruma la hetan liu,” Nia subliña
Negosiante ne’e konta, halo negosiu ida ne’e senti la susfísiente bá moris kada loron, tanbá nesesidade moris nian mak barak liu.
“Husi negosiu ne’ebé ha’u halo la sufisiente responde ba nesesidade moris,maibé ha’u pasénsia hodi luta nafatin bá moris ida ne’e, maski hasoru dezafiu barak,dezafius ne’ebé bo’ot liu mai ha’u kada-vez Governu liu hosi Guarda Munisipiu sira mai duni ami no mai foti ami nia sasan no ema ladun sosa ida ne’e mak dezafiu ha’u hasoru,”Nia esplika
Nia afirma,antes ne’e halo negosiu iha fatin seluk hanesan iha Tasi-Tolu no nia rona isu katak Governu atu hasai sira hosi fatin ne’ebá no agora nia halo negosiu iha Ai-Mutin, durante tinan rua (2) no atu hakat bá tinan tolu (3) ona.
“Estadu duni ami bá mai hanesan ne’e oinsá ho ami nia moris sira ne’e no ami foti osan grupu nian mak ami hodi halo negosiu, Governu halo hanesan tenki loke kampu servisu hodi ami servisu no labele faan sasan tuir dalan ninin,” Nia afirma
Isabel hatete,nia moris mak liu hosi negosiu ki’ik sira hanesan ne’e, nia buka servisu laiha nia tenki loke netik buat ruma hodi hatutan nia moris bá loron ida no loron rua nian.
“Estadu dehan buat sira ne’e taka hotu no duni ami bá mai ne’e oinsá ho ami nia moris lor-loron nian, ami nia presiza no ami nia haan hemu ne’e ami foti hosi ne’ebé mai,ha’u nia moris mak liu hosi negosiu ki’ik sira hanesan ne’e, ha’u buka servisu laiha tenki loke netik buat ruma hodi hatutan nia moris bá loron ida no loron rua nian,” Nia hatete
Negosiante ne’e kestiona, kbi’it la to’o bá servisu mós Estadu la tau atensaun bá kompañia no grupu sira ne’ebé mak kria servisu bá Joven sira.
“Governu sira mós halo diskriminasaun bá sidadaun Timoroan sira,tanbá ita haree momós hela Partidu Politiku nain sira haree liu bá kór, no sira ne’ebé mak manan no sira nia ema mak dumina iha kampu servisu nia laran,sé Governu halo hanesan ne’e oinsá ho ami sira ne’ebé mak la mete bá kór no rasa A rasa B, entaun ami tenki buka dalan liu husi negosiu kiik sira henesan ne’e,ami kompriende no respeitu tebes Governu nia servisu atu halo Nasaun nia mudansa, Maibé Governu mós tenki loke kampu servisu bá ami no joven sira, hodi tina-tinan ema ne’ebé Graduadu no hasai Mestradu labele sai bá buka servisu iha rai liur no tenki servisu iha Ita nia rai laran, tanbá hasai Lisensiatura Graduadu iha Timor,”Nia susere
Isabel dehan,tanbà -sá tinan-tinan ema hasai Mestradu tenki sai atan bá Nasaun sira seluk no sira labele servisu ba nia Nasaun Timor-Leste? Ne’e Tamba sa?.
Isabel rekomenda, bá maluk joven sira no espesiál liu bá maluk feto sira iha Timor laran tomak labele moe atu buka moris no labele hanoin bá matenek.
“Ha’u husu ba maluk joven sira liu-liu ba feto sira iha Timor laran tomak,labele moe buka moris no labele hanoin matenek ne’e ita tau iha parte ida no ita nia moris lor-loron nian buka liu hosi maneira sira hanesan ne’e no tenki esforsu aan nafatin,dala barak ema dehan feto forti Nasaun forti ita nia prinsipiu ida ne’e mak tenki kuda iha ita nia hanoin no kakutak, forsa nafatin hodi hasoru dezafiu sira ne’ebé mak hakarak tenta ita atu halakon ita nia vontade hodi hala’o ita nia moris.” negosiante Isabel hakotu
Isabel Soares da Cruz orijen hosi Munisipiu Ermera Postu-Administrativu Ermera Suku Talimoro Aldeia Liborti no agora halo negosiu iha Munisipiu Dili Postu-Administrativu Dom-Aleixu Suku Bairu-Pite Aldeia São Jose.
Jornálista : Zemidonio Martins /Inacio Silva
Editóra : Delfina Borges
