Estudante UNITAL Duvidas ho Kualidade Reitór Atúal

banner 120x600

(Díli) Mudansa– Estudante Universidade Oriental Timor Lorosa’e (UNITAL) Duvidas ho Kualidade Reitór Atúal Ne’ebé ho nível lisensiatura.

” Relasiona ho problema ne’ebé Universidade Oriental Timor Lorosa’e (UNITAL), hasoru iha dinamiku toma posse iha loron 28 fulan Dezembro tinan 2023 hodi kontinua remandatu Reitór atual, ne’ebé troka mandatu ba reitór foun ne’ebé simu toma posse iha loron 19 fulan juñu tinan 2024, ho polemika ida ne’e sai hanesan problema bo’ot ba ami estudante liu-liu fundasaun la hare’e hetan sistema universitáriu nian bazeia ba Lei Regime kareira Dosentes nian ne’ebé dehan katak lisensiatura (S1) labele hanorin sá tan asumi kargu hanesan Magnifiku Reitór, no ami estudante la konkorda lisensiatura (S1) atu asumi kargu hanesan Magnifiku Reitór ba mandatu tinan tolu (3),tanbá lisensiatura (S1) la merese hetan asinatura husi nível lisensiatura (S1)”, esplika Porta-voz Julião Pacheco, liu husi komunikadu imprensa iha UNITAL,Becora Díli, Segunda-Feira (23/07/24)

Porta-Voz ne’e husu ba fundasaun atu aprezenta rekezitus abilidade husi atual magnifiku Reitór durante semana ida nia laran.

“Ami husu ba fundasaun atu aprezenta rekezitus abilidade husi Magnifiku Reitór foun nian durante semana ida nia laran, ami estudante, inan-aman no públiku hotu duvidas ho kualidade Reitór atual nian, tanbá ne’e ami husu ba Ministériu Ensino Superior no Ajensia Nasionál Akreditasaun Akadémika (ANAAA) atu hare’e asuntu Reitór UNITAL foun ne’ebé mai ho nível lisensiatura no ami duvida liu-liu Magnifiku Reitor atual tenke hatene lolos katak ninia posizaun ne’ebé nia hatur an ba ami estudante hare’e hanesan ambisaun familiarismo no la tulun sosiedade akadémiku iha futuru,”dehan Porta-Voz ne’e

Nia hatutan, ho respeita no hadomi tebes magnifiku Reitór no Fundadór sira, maibé tenki priense rekezitus bazeia ba standar akademiku, estudante hamrik neutru no la halis ba parte ida, maibé ida ne’e sai duni sira nia ezijensia, no ida ne’e sai hanesan estudante sira nia direitu.

“Fundasaun tenki aprezenta grau akademiku ne’ebé a’as liu husi Reitór atual, no desizaun ne’ebé Fundasaun foti ami konsidera hanesan fundasaun la’os uza matan hodi hare’e maibé deside de’it iha nakukun laran,” Porta-Voz sublina

Porta-Voz Julião akresenta, sira konsidera Reitór atul la iha kapasidade no responsabilidade.

“Ami estudante hotu hare’e katak Reitór atual la iha kapasidade no responsabilidade, tanbà da-daun ne’e diploma sira ne’ebé mak graduadus iha Reitór anterior nia tempu pendentes hela, tanbá ne’e ami husu Reitór atual atu halo klarifikasaun no justifikasaun ne’ebé justu,” Nia akresenta

Nia dehan, hare’e ba kualidade magnifiku reitór atual ne’ebé ho nível lisensiatura bele implika ba kualidade estudante sira nian, liu-liu atu asina Diploma ho nível lisensiatura no masteradu nian, ho kualidade hanesan magnifiku reitór atúal bele afeta ba prosesu avaliasaun akreditasaun Universidade nian.

“Ami hakfodak, pela primeira vez ida ne’e akontese iha UNITAL ho nível lisensiatura bele asume kna’ar hanesan reitór,”nia salienta

Enkuantu ho problema ne’e sira mós apela ba públiku liu-liu ba finalista sekundária sira atu la bele kontinua iha Universidade Oriental Timor-Lorosa’e, tanbá da-daun ne’e iha ema nível lisensiatura mak sai nu’udar Magnifiku reitór.

“La iha dalan mak ami sei organiza Universitáriu iha teritóriu Timor laran tomak liu-liu finalista sekundáriu atu la bele asesu iha Universidade Oriental Timor-Lorosa’e (UNITAL)”, nia apela

Porta voz ne’e mós husu ba finalista sira ne’ebé mak prepara hela dokumentus atu ba atu la bele gradua.

“Ami husu ba finalista ne’ebé agora prepara hela dokumentus ba graduasaun atu la bele gradua,tanbá iha implikasaun ba diploma no la garante kualidade diploma iha mundu kompetitivu futuru oin mai”, nia informa

Tanba ne’e sira mós rekomenda ba fundasaun obrigatóriu atu troka no hili magnifiku reitór foun, atu hili reitór foun tenki bazeia ba nível akadémiku no abilidade ne’ebé a’as liu, nune’e husu ba fundasaun atu hare’e no tetu didiak ba magnifiku reitór atúal tanba nia dupla funsaun.

Entretantu estudante sira fó tempu semana ida ba iha fundasaun atu fó resposta ne’ebé klaru, la iha resposta mak sira sei blokeia total atividade aprendizajen iha fakuldade hotu no kontinua asaun grave hasoru fundasaun.

To’o notisia ne’e públika jornalista sira tenta halo konfirmasaun ho Reitór atual,maibé Reitór la iha komentariu.

Jornalista : Sandi Belo/ Remigia Locateli
Editóra : Delfina Borges

banner 325x300