(Díli) Mudansa – Prezidenti Partidu Demokratiku (PD), Mariano Assanami Sabino, iha Nia diskursu hateten, jerasaun foun ne’ebé namkari iha Timor laran nomós iha rai liur, Irlandia, Inglaterra, Korea no Australia mak lutadór ne’ebé hatama fila fali osan hodi kontribui bá ita nia ekonomia iha rai laran.
“Partidu Demokratiku sempre sura ho imi, ho sira ne’ebé iha rai liur sira hanesan Irlandia, Inglaterra, Korea no Australia mak lutadór ne’ebé hatama fila fali osan hodi kontribui bá ita nia ekonomia iha rai laran no rai laran estudante ki’ikoan no Joven sira, imi hotu mak sei lori PD no naín lolós bá PD, la’ós Fundadór de’ít,”Dehan Prezidenti PD liu hosi nia diskursu hafoin selebra aniversariu PD bá dala XXIII, iha sede PD, kolmera Dili, sabado (15/06/24).
Nia akrésenta, PD la’os nain mak fundadór de’ít, maibé jerasaun hotu nian, uma ida ne’ebé iha ne’e kór azúl atu fó matak malirin atu fó oin midar hamnasa kontenti bá jerasaun sira ne’ebé mai, la’os ho oin buis no hirus.
“Se mak hamri’ik ona iha uma ne’e tenki hatene simu, tanbá uma naín sei barak demais, ne’ebé mai atu bá oin,PD nia vizaun klaru no mai hosi transformasaun ne’ebé naruk,PD mai atu hatutan,ho selebrasaun bá tinan XXIII ezisténsia PD nian,foti tema ida katak, PD nia ezisténsia atu tane ukun rasik-aan, Povu Timor-Leste nia Partidu mak PD, naran Partidu ukun rasik-aan, tanbá ne’e mak kaer valor prinsípiu ukun rasik-aan nian,” Nia relata.
Nia akresenta, PD nia vizaun tenki Demokrátiza Ekonomia, Demokrátiza sosiál Polítika, Demokrátiza Instituisaun sira, Demokrátiza infraestrutura katak, buat ne’ebé halo tenki bá Povu, Povu tenki partisipa no Povu tenki iha laran.
“La’os halo buat ida bá grupu ida, maibé buat ne’ebé halo tenki benefísiu bá Povu, tenki konvida Povu iha laran, no partisipasaun Povu tenki kontinua, tanbá ida ne’e mak PD hakarak Demokrátiza setór oin-oin.”Tenik Nia
Governante ne’e hatutan, iha komprímisiu de-onra ne’ebé liu hosi juramentu iha liafuan ikus dehan, “hun ida abut ida no Povu ida bá rai Timor”.
“Komprímisiu de-onra ne’ebé liu hosi juramentu iha liafuan ikus dehan, “hun ida abut ida no Povu ida bá rai Timor” ida ne’e mak komitmentu atu halo rekonsíliasaun, ita ida de’ít hari’i Timor foun ida bá Timoroan tomak,Tanbá ne’e la iha ida mak iha PD laran duvida PD atu bá neebé, tanbá PD nia dalan lós no komúnga hosi leten to’o iha kraik.”Tenik Governante Assanami
Nia afirma,hanesan PD nia juramentu no komprímisiu bá públiku dehan katak, jura bá Maromak ho naran ukun katak, onra ida-idak nian, promete atu hatutan espíritu lutadór sira, espíritu funu naín sira, hodi konstrui no rekonstrui Estadu Direitu Demokrátiku.
Tuir observasaun Media Mudansa (MD) iha terenu nota katak, marka prezensa iha selebrasaun ne’e, Eis-Jeneral Lere Anan Timur, reprezentante Partidu CNRT, Estutura PD hosi Nasionál to’o iha baze.
Jornalista: Ana Ribeiro&Inacio Silva, Estájiada Petronela Nono
Editóra: Delfina Borges
